DILI, 04 Jullu 2025 (TATOLI)—Serbisu Munisipál Edukasaun Baukau (SMEB) ezekuta ona Programa Merenda Eskolár (PME) hamutuk pursentu 52 iha trimestrál daruak.
Xefe Departamentu Parke Eskolár SMEB, Sabino Arlindo Ximenes, esplika programa referidu sei implementa totál loron efetivu hamutuk 150 nune’e husi inísiu to’o trimestrál daruak implementa ona loron efetivu 75 no sei falta loron-75 hodi kompleta duransaun loron PME.
“Ita hela de’it ona loron-75 hodi implementa ba faze datoluk no dahaat. Nune’e, agora ita hato’o pedidu loron-35 bá ona autoridade nia fatin no aprova ona. Agora parte finansa prosesa ona osan bá konta bankária Ekipa Jestaun Programa (EJP),” Xefe Departamentu Parke Eskolár SMEB hateten ba TATOLI via telefónema, sesta ne’e.
Sabino Ximenes esplika katak husi totál pursentu 52 korreponde ba ezekusaun orsamentu hamutuk $136.234,08, nune’e orsamentu ne’ebé sei gastu ba faze datoluk no dahaat hamutuk $125.755,02 korrepondente ba loron efetivu hamutuk 75.
Nia hatutan Edukasaun Baukau kontinua ezekuta PME faze datoluk iha tempu besik ho totál durasaun loron-35 ne’ebé parte finansa Autoridade Administrasaun Munisipál Baukau sei transfere bá konta bankária EJP iha kada eskola sira.
“Ami konfirma nafatin. Parese iha loron 07 to’o 08 Jullu osan bele tama ona iha konta bankária EJP nune’e bele kontinua fali merenda eskolár ba faze datoluk,” Sabino akresenta.
Entretantu, Autoridade Administrasaun Munisipál iha tinan-ne’e aloka orsamentu ba programa merenda eskolár hamutuk $261.990,00 ne’ebé transfere direta ba bankária eskola hamutuk 230 kompostu husi eskola pre-eskolár, ensiñu báziku privadu no públiku.
Programa merenda eskolár ne’e benefísia estudante hamutuk 32.993, ho totál loron efetivu hamutuk 150 ne’ebé bazeia ba livru matadalan fahe ba pursentu 75% husi produtu lokál no pursentu 25 produtu importadu.
Jornalista: Natalino Belo
Editór: Xisto Freitas da Piedade
