DILI, 04 Jullu 2025 (TATOLI)—Inspetora Autoridade Inspesaun Fiskalizasaun Atividade Ekonómika Sanitária no Alimentár (AIFAESA), Odete Viegas, hateten AIFAESA sei halo inspesaun ba hahan sira-ne’ebé mak komunidade faan iha dalan-ninin.
“Hahan sira-ne’ebé mak faan iha dalan ninin ne’e ami halo ona enkontru ho Diretór sira, ami halo hela planu ba trimestre datoluk no dahaat, ba inspensaun ba hahan sira-ne’ebé faan iha dalan-ninin sira-ne’e,” Odete Viegas dehan ba jornalista sira, iha Matadoru, ohin.
Nia esplika, durante ne’e AIFAESA kobre deit ba hotel sira no restaurante sira, maibé agora tenke foka ba hahan sira-ne’ebé mak faan iha dalan-ninin iha sidade Dili.
“Hahan sira-ne’ebé mak faan iha dalan- ninin ne’e, ami sei haree lai padraun sira hodi eduka sira atu nune’e sira bele faan ho di’ak. Maibé, ami sei fó informasaun ba sira katak tenke prepara hahan ho kondisaun ne’ebé mak di’ak, saudavel entermu ijene,” nia konklui.
Jornalista : Felicidade Ximenes
Editór : Cancio Ximenes
