VIKEKE, 05 Jullu 2025 (TATOLI) – Projetu reabilitasaun estrada ne’ebé liga Nunumalau, suku Afalokai bá Iraler, suku Matahoi, postu administrativu Uatulari, munisípiu Vikeke, foin atinje de’it 8%.
Enjeñeiru husi empeza Bere Is Back, Andre Tavares, relata katak progresu reabilitasaun estrada atinje de’it 8%, tanba hasoru difikuldade liuliu udan, ne’ebé fó obstákulu ba empreza atu trasporta materiál sira hanesan fatuk no rai-henek bá iha fatin konstrusaun.
“Tanba ne’e mak ami-nia atinjimentu ki’ik”, Andre Tavares dehan ba Tatoli, iha suku Babulu, ohin.
Nia esplika progresu ho 8,08% ne’e foin konstrui mak valeta, enkuantu muru protesaun no seluk seidauk hahú.
Maski iha difikuldade, empreza iha esperansa hodi atinje meta ne’ebé iha atu konklui obra ne’e. “Karik ami la hasoru difikuldade, ami-nia diretór hakarak rekruta traballadór to’o 700 hodi aselera serbisu. Maibé, kondisaun estrada la di’ak, falta materiál hanesan fatuk, rai-henek difikulta serbisu. Ami iha ekipamentu ba apoia serbisu ne’ebé sufisente hanesan kamioneta, eskavadora no loader ne’ebé destakadu iha fatin konstrusaun”, nia hato’o.
Daudaun, grupu haat kompostu husi traballadór na’in-23 mak envolve iha projetu reabilitasaun estrada diresaun Nunumalau liga bá Iraler.
Projetu reabilitasaun estrada rurál Nunumalai-Iraler inisia iha loron 01 Fevereiru no finaliza no sei konklui iha Setembru 2025, iha responsabilidae empreza Bere is Back.
Pakote ne’e inklui konstrusaun darinajen no pavimentasaun estrada husi pontu 0+00 to’o 2+500, inklui ponte ki’ik rua ho totál orsamentu hamutuk $632,073.34. Projetu referidu superviziona husi tékniku Ministériu Obra Publika (MOP).
Notísia relevante: Autoridade Uatulari lansa projetu reabilitasaun estrada rurál husi Nunumlau bá Iraler
Jornalista: Vitorino Lopes da Costa
Editora: Maria Auxiliadora
