DILI, 07 Jullu 2025 (TATOLI)—Estudante hamutuk na’in-50 husi pre-eskolár rua iha Munisípiu Baukau la envolve iha Programa Merenda Eskolár (PME) durante implementasaun faze daruak.
Xefe Departamentu Parke Eskolár iha Serbisu Munisipál Edukasaun Baukau, Sabino Arlindo Ximenes, esplika estudante na’in-50 husi eskola Santa Ursula (30) no João Paulo II (20) la envolve iha PME tanba falla husi dirijente eskola.
Nia haktuir katak bainhira fornese dadus implementasaun Programa Merenda Eskolár, estudante hirak-ne’e naran la inklui.
Sabino Ximenes esplika parte Edukasaun Baukau halo levantamentu orsamentu ba Autoridade Munisipál Baukau bazeia ba númeru estudante ne’ebé hato’o husi kada eskola nune’e estudante hirak-ne’e lakon direitu tanba dadus dahuluk la hanesan dadus faze daruak.
“Ita fó-hatene sira jere tuir osan ne’ebe iha. Osan ba alunu ne’ebé aumeta ne’e sei tau fali iha faze datoluk fulan Jullu ne’e,” Xefe Departamentu Parke Eskolár SMEB hateten iha ninia kna’ar fatin, Vila Nova, Baukau, segunda ne’e.
Nia esplika, hafoin faze dahuluk ramata, dirijente fornese fali dadus ba Serbisu Munisipál Edukasaun Baukau (SMEB) hodi kontinua implementa ba faze daruak, maibe dadus ne’ebé hato’o husi Pre-eskolár rua referidu hamutuk 140, iha-ne’ebé tuir loloos totál loloos 190.
“Osan ba estudante na’in-50 iha PME ne’e $840.00. Ne’ebé, sira-nia direitu ita sei aumenta fali iha faze datoluk ida-ne’e,” Sabino esklarese.
Programa Merenda Eskolár ba tinan-ne’e, aloka orsamentu ba Ekipa Jestaun Programa (EJP) husi konta banku Eskola Santa Ursula mak jere ho totál orsamentu hamutuk $20.311.
Husi orsamentu ne’ebé prevee sei utiliza fornese hahán ba eskola haat kompostu husi Pre-eskolár Santa Ursula, Pre-eskolár João Paulo II, Eskola Ensinu Báziku Primeiru, Segundu no Terseiru Síklu Santa Ursula no Ensinu Báziku Primeiru no Segundu Siklu Al Amal Baukau.
Jornalista: Natalino Belo
Editór: Xisto Freitas da Piedade
