VIKEKE, 07 Jullu 2025 (TATOLI)—Organizasaun Geloog husi Austrália hamutuk ho Kardinia International School Austrália fó apoiu ekipamentu hanesan laptop marka Acer no HP unidade 24, rede internet Starlink no ekipamentu múzika (biola rua no órgaun 1) ba Organizasaun Naun Govermentál Knua Haberan Komunidade (KHC-sigla portugeza).
Iha distrbuisaun ekipamentu ne’e, Reprezentante Geelong Austrália no Kardinia International School Austrália, Chris Hansen, esplika, apoia fasilidade laptop, ekipamentu no Starlink ho objetivu atu tulun KHC fó formasaun ba labarik sira iha munisípiu.
“Ekipamentu sira-ne’e, ami halo esforsu mak halibur hodi fó apoia ba KHC. Liuhusi apoia ida-ne’e atu reforsa liután dezenvolvimentu rekursu umanu iha Timor-Leste liuhusi kapasitasaun ba ita-nia labarik sira-ne’ebé agora daudaun aprende lian inglés iha KHC,” Chris Hansen ba jornalista sira, iha edifísiu KHC, Suku Uma Ki’ik, Vikeke, segunda ne’e.
Iha fatin hanesan, Diretór Ezekutivu KHC, Augusto Pinto, relata apoia ne’e bele fasilita ona KHC atu fó formasaun ba labarik sira.
Nia relata, daudaun ne’e KHC oferese formasaun gratuita sira hanesan inglés bázika, muzíka, pinta ka arte no sei loke mós formasaun komputadór ba estudante sira.
Augusto haktuir labarik sira-ne’ebé aprende lian inglés, muzika no arte hamutuk na’in-76 iha faze dahuluk. Formasaun ne’e realiza iha edifísiu KHC, Beobe, Suku Uma Ki’ik.
Iha serimónia distribuisaun ekipamentu ne’e, partisipa husi funsionáriu no estrutura KHC no autoridade lokál sira.
Jornalista: Vitorino Lopez da Costa
Editór: Xisto Freitas da Piedade
