Governu distribui sirkulár konjunta ba autoridade Kovalima hodi sulan animál
KOVALIMA, 07 Jullu 2025 (TATOLI )- Ministériu Agrikultura, Pekuária, Peska no Floresta liuhusi, Diretora Nasionál Veterinária, Joanita Jong, distribui sirkulár konjunta atu sulan animál hanesan asu, busa no lekirauk ba autoridade sira iha munisípiu Kovalima.
Governu hasai sirkulár konjunta ne’e relasiona moras virus raiva sai preokupasaun públiku ne’ebé sai ameasadu ba saúde públiku iha Timor-Leste (TL) , ne’ebé mak hamate ona timor-oan sira.
“Di’ak liu kesi kedas animál sira hanesan asu no bolu tékniku sira hodi halo teste atu hatene pozitivu ka negativu bainhira asu tata favór pasa informasaun”, Diretora Nasionál Veterinária, Joanita Jong hato’o iha salaun AMC ohin.
Tuir dadus timor-oan na’in hitu mak mate, tanba moras raiva atu labele akontese tan favór boot ida koorpera atu vasina asu bainhira viziñu nia asu mak la vasina mós nafatin fó risku.
“Sirkulár konjunta ami distribui ba ita-nia sekretáriu munisipál, lideransa lokál, fahe hodi mós ba seguransa sira ne’e ofisiál tanba asina husi Vise Ministru saúde ,sekretáriu Estadu Pekuária no Sekretáriu Estadu Asuntu Topónimia Organizasaun Urbanu ( SEATOU)” nia esplika.
Ho nune’e, ekipa sira hahú vasina animál tama sai uma atu lakohi fó risku ba membru ba família no mós husu atu hapara ona lori asu viajen husi munísipiu ba munisípiu sira seluk. Tán ne’e lori asu husi munisípiu atu ba Dili iha postu Kasnafar sona asu mate laiha negosiásaun.
Governu hasai sirkulár bazeia ba dekretu-lei númeru 12/2014, iha loron 14 Maiu kona-ba retrisaun movimentu animál nian iha área urbana iha artigu 3, alinea D no E iha artigu 5 númeru 1 aliena a no númeru 2, artigu 7,9,10 kapitulu IV, sansaun artigu 9 ho koima
Iha artigu 8 husi dekretu-lei númeru 3/2024, iha loron 17 Janeiru kona-ba ijiene ordem públika hodi husu komunidade ne’ebé hakiak asu, busa no lekirauk atu sulan no kesi labele husik livre iha komunidade nia le’et liuliu komunidade ne’ebé hela besik iha área fronteira
Husu ba sidadaun sira ne’ebé haki’ak animál hanesan Asu, Busa no Lekirauk obrigatoriamente kopera ho ekipa vasinadór atu asegura animál hodi hetan vasina ou voluntáriamente lori animal hirak ne’e ba fatin postu vasinasaun ne’ebe prepara husi Ministériu Agrikultura, Pekuária Peska no Florestas ka klinika privadu animál iha munisípiu idak-idak.
Jornalista:Celestina Teles
Editór:Florenco Miranda Ximenes
