Kooperativa HAMAIFOR hahú envolve halo natar ektare rua
VIKEKE, 07 Jullu 2025 (TATOLI)–Prezidente Kooperativa HAMAIFOR, Mateus Soares, informa, iha tinan 2025 kooperativa HAMAIFOR deside hahú envolve aan halo natar ektare rua hodi reforsa ekonómia.
“Ami-nia kooperativa HAMAIFOR durante ne’e halo atividade rai osan no empresta osan, produsaun mina. Maibé, ba tinan 2025 ne’e ami planeia ba produsaun hare ne’ebé agora halo ona natar hamutuk ektare rua, atu reforsa ami-nia kooperativa”, Mateus Soares ba TATOLI, iha Suku Bahalara Uain, segunda ne’e.
Prezidente Kooperativa HAMIFOR ne’e profunda, natar ne’ebé membru kooperativa sira halo ho objetivu atu reforsa kooperativa nia ekonomia liuhusi produsaun agríkola nune’e ba futuru bele la’o ho produsaun ai-han sira iha rai-laran.
“Se ita hanoin de’it ba osan, entaun ita labele prepara ai-han. Entaun, ida-ne’e mak ha’u-nia planu ba futuru ne’e halai ba osan no produsaun produtu lokál,” Mateus subliña.
Nia dehan, esperansa kooperativa HAMAIFOR hakarak moris ho agrikultura tanba nasaun Timor Leste maioria ema agrikultór.
“Nune’e, ita atu hasa’e produsaun ita tenke la’o tuir programa Governu nian, halo natar karik tenke kuda liña tanba ita kuda liña hare di’ak,” nia hato’o.
Mateus tenik kooperativa HAMAIFOR planu ba tinan oin (2026) sei halo toos hodi kuda batar no produtu sira seluk hodi fornese bá merkadu.
“Ami iha planu 2026 atu halo tan toos, ne’ebé sei prepara konstrui armazein nune’e produsaun produtu hare bele rai iha armazein laran,” nia realsa.
Mateus esplika katak kooperativa ne’e iha ligasaun ho Governu, tanba kooperativa halibur produtu fó ba Governu sosa hodi diversifika ekonomia iha baze.
Kona-ba Kooperativa HAMAIFOR inisia iha loron 10 fulan-Juñu 2021, fundadór hamutuk ema na’in-33 no harii ho kapitál $1.056. Enkuantu, membru Kooperativa HAMAIFOR atuál ne’e ho totál hamutuk ema na’in-121 ne’ebé kompostu husi feto na’in-66 no mane na‘in-55, no kapitál akumula ona osan hamutuk $47.000. Antes ne’e, Kooperativa HAMAIFOR implementa atividade produsaun mina-sona, atividade rai no empresta osan.
Jornalista: Vitorino Lopez da Costa
Editór: Xisto Freitas da Piedade
