BAUKAU, 07 Jullu 2025 (TATOLI)—Vítima ho inisiál DB lakon vida iha akontesimentu asidente tráfegu entre karreta no motór iha área Vila Nova, Tirilolo, Postu Administrativu Baukau Vila.
Asidente referidu akontese iha loron Domingu, 06 Jullu, bainhira vítima mane (52) hamutuk oan mane uza motór matic ho xapa matríkula P.0110 xoke karreta baskulante ho xapa matríkula 53.833 hodi rezulta vítima lakon vida iha lokál asidente no kanek natoon.
“Hodikalan ne’e, aman ho oan soke karreta. Aman mate fatin, enkuantu oan kanek maibé kanek natoon no alta tiha ona,” Diretór Klínika Ospitál Rejionál Eduardo Ximenes (HoREX-sigla portugeza) Baukau, Mouzinho Francisco hateten iha ninia kna’ar fatin, Vila Nova, segunda ne’e.
Nia haktuir mezmu transporta bá HoREX hodi hetan tratamentu maibé vítima DB iis-kotu ona nune’e bainhira to’o iha emerjénsia diretamente lori bá sala mortuária antes tranzlada bá família, enkuantu oan mane kontinua halo tratamentu no ohin (segunda) parte ospitál deside fila bá uma tanba kondisaun rekuperada.
“Nia mai ho kondisaun iis-kotu entaun lori liubá mortuariu. Tuir informasaun karreta xoke parese sama nia ulun ne’e mak rahun,” Mouzinho informa.
Entretantu, asidente tráfegu referida parte Komandu Polísia Nasionál Timor-Leste (PNTL) Munisípiu Baukau liuhosi seksaun tránzitu asegura ona evidénsia karreta inklui motór hodi hein kontinua ninia prosesu.
Jornalista: Natalino Belo
Editór: Xisto Freitas da Piedade
