Agrikultór Luka husu MAPPF konstrui barrajen distribui bee ba natar Wedare
VIKEKE, 08 Jullu 2025 (TATOLI)—Komunidade agrikultór husi Suku Luka, Postu Administrativu Vikeke Vila, Munisípiu Vikeke, husu Ministériu Agrikultura Peska, Pekuária no Floresta (MAPPF) konstrui barrajen bee nian ida iha mota Wetuku, hodi fornese bee bá natar Wedare, lokalizadu iha Suku Luka, Postu Vikeke Vila.
Koordenadór Grupu Wedare Badak, Idelfonso Mendonça, haktuir irrigasaun ne’ebé fornese bee ba natar Wedare ne’e, bee la forsa tanba bee barak bá liu tasi, nune’e presiza konstrui barrajen bee nian ida hodi satan bee, nune’e bee bele sai forsa hodi fornese bá natar.
“Se la konstrui barrajen bee nian, entaun bee bá liu tasi. Tempu udan ami bele uza bee ho di’ak, maibé udan para ami tenke hadau malu bee. Entaun nia impaktu mak hare balun bele sai mate, produsaun hare mós sei menus tanba fornese bee bá natar ladún di’ak. Tanba ne’e mak ami husu ministériu konstrui barrajen ida ba ami hodi halibur bee iha laran, depois fornese ba natar sira iha Wedare,” Idelfonso Mendonça ba TATOLI, iha Suku Luka, tersa ne’e.
Idelfonso sente agrikultór sira durante ne’e halo natar Wedare preokupa mak irrigasaun tanba irrigasaun iha, maibé bee sulin hotu bá tasi mak barak liu, maibé distribui ba natar débitu bee ki’ik.
“Ida-ne’e sai hanesan ami-nia dezafiu ne’ebé ami hasoru durante ne’e. Antes ne’e, ami hato’o ona proposta ba MAPPF hodi kontrui barrajen bee nian, maibé to’o agora ami seidauk rona rezutadu,” nia hato’o.
Tuir dadus, natar iha área Wedare totál ektare 60. Husi númeru ne’e, ektare 30 ativu no ektare 30 mak daudaun ne’e sei abandonadu tanba bee la sufisiente. Enkunatu, husi natar sira-ne’e benifísia ba populasaun na’in-30 ne’ebé halo natar iha área Wedare.
Hatán preokupasaun irrigasaun ne’e, Diretór Servisu MAPPF Munisípiu Vikeke, Olívio Soares Freitas, hateten kona-ba irrigasaun MAPPF sei kontinua akompaña agrikultór hodi rezolve bee ba natar sira-ne’ebé agora sei abandonadu.
“Ha’u hanoin MAPPF sei akompaña agrikultór sira hanesan natar sira-ne’ebé abandonadu ita sei buka dalan, maski liuhusi prosesu ne’ebé naruk, maibé ita sei esforsu hodi haree irrigasaun sira-ne’e,” nia promete.
Natar Wedare totál ektare 30 ne’e halai husi grupu tolu kompostu husi Grupu Wedare Naruk, Wadare Badak no Grupu Ai-Manas Rai ho totál membru grupu hamutuk na’in-30.
Jornalista: Vitorino Lopez da Costa
Editór: Xisto Freitas da Piedade
