DILI, 08 Jullu 2025 (TATOLI)–Federasaun Karate-do Timor-Leste (FKTL) husu adeptu timoroan hotu espesiál atleta Karate-do atu fó apoia ba atleta na’in-haat ne’ebé sei tuir kompetisaun iha jogu Komunidade Nasaun Lian Portugés (CPLP-sigla portugeza).
Sekretáriu Jerál FKTL, António Carlos de Araújo, sente orgullu no agradese ba Komisaun Organizadora ne’ebé hili FKTL hola-parte iha eventu jogu entre nasaun lian Portugés.
“FKTL hakarak maluk timoroan hotu ne’ebé hela iha área kapitál Dili bele fó apoia ba ita-nia atleta tanba reprezenta no lori Timor-Leste nia naran,” Sekretáriu Jerál FKTL informa ba TATOLI iha ninia kna’ar fatin, Jináziu Dili, tersa ne’e.
António Araújo konsidera eventu jogu CPLP ne’e parte mentaliza atleta sira-ne’ebé maioria adversária sira iha talentu ne’ebé sei eleva atleta sira-nia esperiénsia hodi hein eventu internasionál sira iha futuru.
“Husu mós ba atleta sira atu hatudu jogu ne’ebé atrativu,” António sujere.
Notísia relevante: Atleta Karate-do na’in-haat sei partisipa jogu CPLP
FKTL rasik hahú halo preparasaun hanesan selesaun ba atleta hamutuk na’in-ualu iha-ne’ebé na’in-haat tenke elemida no na’in-haat seluk avansa ne’ebé hahú halo preparasaun iha fulan-Maiu no hetan asisténsia direta husi treinadór inklui fasilita husi Komisaun Organizadora jogu CPLP.
Atleta na’in-haat ne’ebé sei joga iha CPLP kompostu Nencia Gusmão sei jogu iha kategoria klase kilógrama 48, Marica Mota klase kilógrama 53, Alexandrino Messi klase kilógrama 55 no Eugénio Soares sei joga iha kategoria klase kilógrama 60.
Entretantu, jogu CPLP sei realiza iha Timor-Leste no sei partisipa husi nasaun hitu ho totál atleta hamutuk 535 ne’ebé halo preparasaun iha faze tolu hanesan interna, prepara realizasaun no ezekusaun ne’ebé sei abertura iha loron 17-27 Jullu tinan ne’e.
Jornalista: Natalino Belo
Editór: Xisto Freitas da Piedade
