DILI, 08 Jullu 2025 (TATOLI)—Primeiru Ministru, Kay Rala Xanana Gusmão, enkontru Ministéria Saúde no Embaixadór Malázia ba Timor-Leste no ekipa IHH Helathycare Malázia, ne’ebé tempu badak sei fasilita formasaun ba profisionál saúde sira iha territóriu nasionál hodi kapasita sira-nia koñesementu ba tratamentu moras oioin ne’ebé akontese iha Timor-Leste.
Ministra Saude, Elia A. A. dos Reis, hateten enkontru ho Primeiru Ministru hodi relata oinsá halo kapasitasaun ba profísionál saúde sira iha Timor-Leste liuliu hasa’e koñesementu iha área siénsia saúde hodi atende moras sira.
“Ekipa IHH Healthycare sei fó formasaun ba ita-nia pesoál saúde sira. Aleinde ne’e, sira la’ós apoiu hodi fó de’it tratamentu ba ita-nia pasiente sira-ne’ebé ita haruka ba rai-li’ur, maibé sira mós hakarak ajuda ita oinsá atu hasa’e ita-nia profisionál saúde sira-nia kapasidade,” Ministra Saúde ne’e informa ba jornalista sira iha Palásiu Governu, ohin.
Tuir planu, Timor-Leste ita sei halo nota entendimentu ho sira hodi fó espasu formasaun ne’e, katak espesialista sira husi Malázia mak sei mai fó formasaun ka TL haruka profisionál saúde sira mak ba tuir formasaun iha Malázia, no kestaun sira-ne’e sei tetu hamutuk antes implementa.
Formasaun ne’e sei envolve profisionál saúde sira hotu iha territóriu nasionál, liuliu ba iha munisípiu sira-ne’ebé mak iha risku ba moras afetadu oioin.
Kooperasaun ida-ne’e sei iha faze analizasaun no bainhira termina ona prosesu peskiza ba implikasaun moras sira mak sei kontinua ho asuntu ida-ne’e.
Halo peskiza ba kauza moras iha Timor-Leste
Entretantu, nia dehan, Primeiru Mninistu, Jose Alexandre Kay Rala Xana Gusmão konkorda servisu hamutuk hodi halo peskiza ba kauza husi moras ne’ebé sempre akontese no aumenta beibeik ho eskala ne’ebé boot.
Nia dehan, Primeiru Ministru orienta ona Ministériu Saúde servisu hamutuk ho ekipa IHH Healthycare Malázia, oinsá parte Ministériu Saúde no Ministériu Agrikultura atu halo peskiza hodi define implikasaun ba moras sira-ne’ebé maka kada loron sempre aumenta.
“Nune’e, iha konkordánsia ida servisu hamutuk ho ekipa IHH husi Malázia hodi haree ba situasaun sira-ne’ebé mak ohin xefe Governu hato’o ona,” nia hateten.
Ministra esplika, tamba IHH Healthycare Malázia hanesan ospitál boot liu iha nasaun Malázia ne’ebé akumula ospitál lokál no internasionál hamutuk 18 no ospitál hirak ne’e mak asina memorandu ho Timor-Leste hodi fasilita tratamentu ba pasiente sira-ne’ebé transfere husi ne’e.
Embaixadór Malázia ba Timor-Leste, Amarjit Sarjit, hateten iha sorrumutu ohin nia lori ekipa delegasaun husi komponente ospitál boot liu iha Malázia ne’ebé antes ne’e iha ona ligasaun servisu hamutuk entre nasaun rua ne’e, hodi reforsa servisu médiku Timor-nian hodi halo peskiza no identifika kauza husi moras ne’ebé sempre akontese beibeik ho eskala ne’ebé boot.
Aleinde ne’e, tulun halo atendementu ba pasiente sira hotu ne’ebé mak halo tratamentu iha ospitál, entaun parte IHH Healthycare Malázia prontu atu koordena servisu hamutuk ida-ne’ebé orienta husi Primeiru Ministu rasik.
Jornalista : Alexandra da Costa
Editór : Cancio Ximenes
