Komunidade aldeia Pelet-Somokanua preokupa ladauk asesu estrada-eletrisidade
KOVALIMA, 08 Jullu 2025 (TATOLI)- Komunidade husi aldeia Pelet no Somokanu, suku Lour, postu administrativu Zumalai, munisípiu Kovalima, preokupa tanba to’o agora la asesu asesu infraestrutura bázika hanesan estrada no eletrisidade.
“ Ha’u nia aldeia somokanu ami enfrenta seidauk asesu ba infraestrutura bázika hanesan estrada, eletrisidade, maske ami nia preokupasaun hato’o ona maibé ohin loron seidauk iha rezultadu”, Xefe-Aldeia Somokanua, Flavio Branco, hato’o preokupasaun ne’e ba jornalista sira, iha salaun AMC ohin.
Nia dehan daudaun kondisaun estrada ne’ebé aat difikulta komunidade sira halo movimentu ho transporte públiku no privadu hodi lori produtu lokál bá mai iha merkadu.
Tanba ne’e, Xefe Aldeia ne’e reprezenta komunidade husu ba ministériu relevante atu solusiona problema komunidade iha aldeia rua ne’e, nune’e bele fasilita komunidade sira halo movimentu bá merkadu.
“ Ami la asesu eletrisidade hahú husi Timor-Leste ukun rasik-aan, nune’e komunidade sira kontinua moris iha nakuku laran”, nia preokupa.
Populasaun iha Aldeia Somokanua hamutuk 489 ho nia totál Uma-kain 120-resin.
Iha sorin seluk Xefe Aldeia Pelet, Carlito Tilman Barreto, mós hato’o preokupasaun ne’ebé hanesan ho tanba komunidade seidauk asesu ba enfraestrutura bázika hanesan estrada, bee-moos no eletrisidade.
“ Ho kondisaun estrada ne’ebé grave bainhira iha tempu udan komunidade sira labele halo movimentu, tanba haree ba kondisaun estrada nakonu ho tahu, nune’e transporte privadu mós labele halo movimentu”, nia lamenta.
Iha tinan 2017, Prosesu atu dada eletrisidade ba komunidade iha aldeia Pelet husi empreza balun hatun ona besi maibé iha 2023 ne’e foti hikas .
Entretantu, iha 2024, atu dada eletrisidade tau ona kuadru avizu iha Ritiluli bá Pelet no Somokanua, maibé to’o ohin loron mós seidauk dada eletrisidade, ho nune’e iha tempu kalan komunidade sira uza solár pané l ne’ebé sosa rasik husi komunidade hodi bele hetan naroman.
Tuir dadus aldeia Pelet ,suku Lour postu administrativu Zumalai ho nia Xefe Família hamutuk 157 ho totál populasaun hamutuk 708.
Hatan ba preokupasaun ne’e, Administradór Postu Administrativu Zumalai, Alipio Magno, rekoñese komunidade aldeia-rua ne’e seidauk asesu ba enfraestrutura bázika.
“Iha aldeia Pelet no somokanua nia problema hanesan komunidade sira la asesu ba bee-moos ,estrada no seidauk asesu eletrisidade, nune’e komunidade sira uza de’it solár panel hodi bele sente nia naroman”, Autoridade ne’e esplika.
Ho problema ne’ebé mak komunidade enfrenta hanesan autoridade postu administrativu Zumalai atu rezolve liuhosi programa Nasionál Dezenvolvimentu Suku (PNDS) tau iha planu prioridade no deside iha programa PNDS no Planu Dezenvolvimentu Integradu Munisipal (PDIM) hato’o ona maibé sei deside liuhusi enkontru hahú iha iha nivél aldeia to’o iha postu administrativu.
Jornalista:Celestina Teles
Editór:Florenco Miranda Ximenes
