DILI, 08 Jullu 2025 (TATOLI)–Governu liuhosi Ministériu Asuntu Kombatente Libertasaun Nasionál (MAKLN), Tersa ne’e, entegra hikas lista reklamasaun no kontestasaun kombatente rejistradu dahuluk no daruaak ba Konsellu Kombatente Libertasaun Nasionál (CCLN, sigla portugés) munisipál.
“Kona-ba dadus sira-ne’ebé ami públika sai iha Janeiru 2025, nune’e ohin ami fó sai fali públiku para halo kontestasaun no reklamasaun. Ami sei entrega filafali dokumentu tuir munisípiu idaidak nian ba CCLN munisipál,” Ministru Asuntu Kombatente Libertasaun Nasionál, Gil da Costa Monteiro ‘Oan Soru’ informa ba jornalista sira, iha salaun MAKLN, Komoro.
Lista ne’ebé simu hamutuk 61.704, kompostu husi reklamasaun 58.584 no kontestasaun 3.120, ne’ebé husi ne’e ema hamutuk 53.272 iha teritóriu halo protestu hasoru kombatente sira.
“Totál ne’ebé ha’u temi ne’e tékniku Ministériu hatama hotu tiha ona, nune’e ohin entrega hikas bá CCLN munisipál. Ida-ne’e tui Artigu 35 númeru 1 estatutu kombatente nasionál dekretu-lei númeru 7 estatutu orgániku CCLN, artigu 6 aliña H,” nia akresenta.
Hafoin ne’e, Konsellu Kombatente sei halo reuniaun kona-ba lista reklamasaun no kontestasaun hodi foti desizaun liuhusi konferénsia no kongresu.
“Ida-ne’ebé mak hakur mota liu to’o foho tutun mak bele no ida-ne’ebé labele mak pasiénsia,” Ministru katak.
Notísia relevante : MAKLN kontinua prosesa lista reklamasaun no kontestasaun
Aleinde ne’e, iha balun ne’ebé reklama nafatin ema naun kombatente maibé nia nafatin hatama dokumentu signifika ema ne’e la satisfeitu no lista taka sai dehan nia la’ós kombatente depois sai iha editál nafatin dehan nia la’ós kombatente.
“Ida mak normalmente funsiona hanesan ne’e. Lei mak la’o hanesan ne’e, ne’ebé ami la’o tuir. Nune’e fó hatene ba públiku, ohin ami entrega dokumentu fíziku ba CCLN hodi halo reuniaun no halo desizaun ruma depois mak tempu oin mai mak ita rona,” nia dehan.
CCLN presiza halo reuniaun tanba dadus hotu mai la’ós reklamasaun de’it, iha mós ema ne’ebé la hetanreklamasaun no kontestasaun.
“Ema ida-ne’ebé la protestu, sira-ne’e hatama rekerimentu. Ema ne’ebé halo rekerimentu hahú hosi tinan 24, ema sobrevivénsia nomós Prestasaun Pekuniária Únika (PPU) hamutuk 21.696. Ida-ne’e ema ne’ebé la sofre kontestasaun no reklamasaun. Ida-ne’e ami sei halo duni pagamentu maibé ne’e iha Dezembru, maibé la signifika sira-ne’e simu hotu. Tanba naran sira-ne’e sei taka tan. Bainhira taka mak iha tan kontestasaun hasoru nia mak nia hela,” nia informa.
Reklamasaun no kontestasaun husi munisípiu Aileu ema 3.179 halo reklamasaun no kontestasaun hasoru kombatente 2.822, Ainaro ema 5.666 halo reklamasaun no kontestasaun hasoru kombatente 4.023, Baukau ema 9.333 halo reklamasaun no kontestasaun hasoru kombatente hamutuk 8.459.
Bobonaru ema 6.757 halo reklamasaun no kontestasaun hasoru kombatente 5.939, Kovalima ema 5.239 halo reklamasaun no kontestasaun hasoru kombatente hamutuk 4.806, Dili ema 2.825 halo reklamasaun no kontestasaun hasoru kombatente hamutuk 2.375.
Ermera ema 8.566 halo reklamasaun no kontestasaun hasoru kombatente hamutuk 7.214. Lautein ema 2.677 halo reklamasaun no kontestasaun hasoru kombatente hamutuk 2.470. Likisá ema 1.835 halo reklamasaun no kontestasaun hasoru kombatente hamutuk 1.556. Manatutu ema 3.635 halo reklamasaun no kontestasaun hasoru kombatente hamutuk 3.391.
Manufahi ema 3.419 halo reklamasaun no kontestasaun hasoru kombatente hamutuk 3.202, Oekusi ema 3.112 halo reklamasaun no kontestasaun hasoru kombatente hamutuk 2.736, Vikeke ema 5.449 halo reklamasaun no kontestasaun hasoru kombatente hamutuk 4.258.
Ema na’in-haat laiha munisípiu halo reklamasaun no kontestasaun hasoru kombatente na’in-tolu. Ema husi rai-li’ur hamutuk 18 halo mós reklamasaun no kontestasaun hasoru kombatente iha 18.
Jornalista : Osória Marques
Editora : Julia Chatarina
