DILI, 08 Jullu 2025 (TATOLI)–Governu liuhosi Ministériu Juventude, Desportu, Arte no Kultura (MJDAK) planeia hakerek no prodús livru istória kona-ba Munisípiu Baukau.
Diretór Nasionál Patrimóniu Kulturál MJDAK, Manuel Ximenes Smith esplika Ministériu iha programa kona-ba kampaña nasionál kulturál ne’ebé implementa iha nivel munisípiu ho objetivu atu rona istória hanesan Baukau ho fonte husi lia-na’in sira.
“Fulan oin ha’u sei haruka ekipa téknika durante loron-lima iha-ne’e atu haree dokumentu eransa kulturál iha Baukau laran, ikus ita prodús livru atu sosializa ba komunidade bele entende istória munisípiu nian,” Manuel Smith hateten hafoin lansa kampaña nasionál kulturál iha Vila Antiga, Baukau, tersa ne’e.
Nia salienta, ekipa nasionál ne’ebé halo lavantamentu sei foku ba eransa kulturál munisípiu ne’ebé beiala sira husik hela iha-ne’ebé aleinde Baukau, MJDAK mós sei kontinua hala’o iha munisípiu rua seluk hanesan Manatutu no Lautein.
Obejetivu husi produsaun livru sai nu’udár dokumentu no prezerva istória nune’e sei kontinua sosializa ba komunidade, liuliu Juventude sira nune’e bele entende istória no kontinua valoriza kulturál iha kada munisípiu.
Manuel konsidera istória kona-ba munisípiu tenke kontinua tranzmite ba jerasaun foun sira atubele haree prosesu sustentabilidade ba iha prezervasaun eransa kulturál ne’ebé to’o agora istória kona-ba kada munisípiu ne’ebé maioria Baukau-oan rasik barak la hatene.
“Ita presiza esplora uma-lisan sira, husu katuas lia-na’in sira-nia kontribuisaun atu loke istória ba jerasaun foun sira atu banati tuir,” Manuel subliña.
Entretantu, MJDAK realiza Programa Nasionál Kulturál durante loron-tolu iha Baukau, husi 07-09 Jullu ne’ebé hetan partisipasaun husi autoridade administrasaun, postu no suku inklui inklui lia-na’in sira husi postu administrativu ualu.
Jornalista: Natalino Belo
Editór: Xisto Freitas da Piedade
