DILI, 08 Jullu 2025 (TATOLI) – Deputada CNRT, Cedelízia Faria dos Santos, husu ba Governu atu aprezenta proposta Lei Arkivu Nasionál ba órgaun lejizlativu hodi bele halo diskusaun no aprovasaun.
Nia dehan lei ne’e ninia ezbosu uluk iha ona, maibé to’o agora seidauk lori fali bá Parlamentu atu debate.
Bainhira lei ne’e seidauk iha maka sei difikulta atu halo rejistu ba patrimóniu kulturál iha UNESCO.
Nia fó ezemplu, edifísiu Palásiu Governu ne’e harii kle’ur, iha tempu portugés nia ukun, maibé tanba laiha Lei Arkivu maka labele rejista iha lista arkivu nasionál mós.
Tanba ne’e, deputada solisita ba Ministériu Administrasaun Estatál (MAE) atu haree lejizlasaun referida hodi trata lalais durante mandatu Nonu Governu nian.
Vise-Ministru ba Asuntu Parlamentár, Adérito Hugo da Costa, rejista kestaun ne’e no sei hato’o ba entidade tutela hodi toma atensaun.
Lembra katak, iha mandatu Governu Daualuk, MAE prepara ona ezbosu Lei Arkivu Nasionál, ne’ebé iha momentu ne’ebá iha hela faze diskusaun entre ekipa téknika no asesór jurídiku sira.
Aleinde ne’e, Centro Nacional Chega (CNC) mós antes ne’e husu Governu atu aselera ezbosu lei Patrimónia Kulturál no Lei Arkivu nian, nune’e proteje sítiu istóriku no arkivu istóriku sira iha Timor-Leste.
Tuir nia, Lei Arkivu nian ne’e urjente tebes hodi garante protesaun ba arkivu istóriku ne’ebé nesesita restrisaun ba asesu no publika iha públiku.
Notísia relevante: CNC presiza lei arkivu nasionál asegura dokumentu
Jornalista: Nelson de Sousa
Editora: Maria Auxiliadora
