VIKEKE, 08 Jullu 2025 (TATOLI)—Progresu implementasaun projetu eletrifikasaun iha Suku Uma Ki’ik, Postu Administrativu Vikeke Vila, Munisípiu Vikeke, iha progresu nia laran.
Xefe Suku Uma Ki’ik, Claudino Amaral, haktuir projetu eletrifikasaun ne’ebé implementa iha aldeia haat iha Suku Uma Ki’ik agora daudaun empreza hala’o hela servisu.
“Ami autoridade suku kontinua akompaña empreza hodi aselera servisu. Foin lalais paradu tiha relasiona ho kompra sasán tanba sasán eletrifikasaun nian empreza sosa iha Surabaya, Indonézia. Tan ne’e mak obra ne’e seidauk finalizada, maibé empreza fó-hatene ami katak sasán sosa hotu ona no to’o ona iha Portu Tibar,” Claudino Amaral ba jornalista sira, iha Suku Uma Ki’ik, tersa ne’e.
Autoridade ne’e dehan, sasán ne’ebé empreza sosa hanesan fiu, trafo inklui sasán sira seluk seidauk distribui tanba empreza sei halo karta ba responsavel Portu Tibar no Governu hafoin transporta mai fatin implementasaun obra.
Tuir nia haree servisu fíziku hanesan kuda ai-rin eletrisidade iha pontu entrada iha Suku Uma Ki’ik prontu hotu ona, hein mota trafo, dada fiu no instala bá komunidade nia uma.
“Agora, servisu ne’ebé traballadór sira atu halo tan mak monta trafo, dada fiu no instalasaun. Nune’e, ha’u nafatin halo komunikasaun ho empreza atu aselera obra referida,” nia hato’o.
Claudino haktuir, komunidade husi aldeia haat ne’e kuaze tinan barak la asesu ba eletrisidade.
“Kuandu obra ida-ne’e finalizada, komunidade ne’ebé hela iha suku balun sei muda sai tanba área sira-ne’ebé agora liga eletrisidade ba ne’e rai luan,” nia tenik.
Projetu eletrifikasaun ne’e lansada iha Fevereiru 2025. Projetu ne’e sei benifísia uma-kain 193 husi aldeia haat hanesan Raihun, Makadean, Maroman no Ainauain.
Projetu referidu ho númeru kontratu 004/wk/EDTL,E.P 2025, ho kustu $247.903,60, ne’ebé responsabiliza husi empreza Uca-Aba Unip, Lda.
Jornalista: Vitorino Lopez da Costa
Editór: Xisto Freitas da Piedade
