Xanana sei dezloka ba Kovalima observa estrada Fatumea-Fohorem
DILI, 08 Jullu 2025 (TATOLI)–Primeiru-Ministru, Kay Rala Xanana Gusmão, hateten, ohin, nia sei dezloka ba Covalima hodi observa infraestrutura bázika sira iha munisípiu referidu liuliu estrada sira iha jona fronteira iha postu administrativu Fatumea no Fohorem.
“Ha’u informa ba Prezidente Repúblika katak, ha’u sei ba toba iha Suai, atu haree estrada sira iha Fatumea no Fohorem. Ba haree estrada sira-ne’e tanba tanba iha fulan-Agostu ne’e iha ona Komité Revizaun Orsamentál atu haree lolos osan ba saida, tenke haree kondisaun sira hotu mak ita hatene ida-ne’e prioridade,” Xefe Governu ne’e hateten ba jornalista sira iha Palásiu Prezidensiál Nicolau Lobato, Bairru Pite, ohin.
Antes ne’e, Prezidente Repúblika, José Ramos Horta hala’o ona reuniaun ho Ministru Planeamentu Investimentu Estratéjiku (MPIE), Gastão Sousa, hodi husu kona-ba oinsá Governu tenke tau atensaun ba estrada sira iha jona fronteira ne’ebé ho kondisaun aat tebes.
Tanba ne’e no ho ida-ne’e mak Primeiru-Ministru deside ohin (09 Jullu 2025) aranka ba Kovalima hodi observa direta estrada hirak ne’e, no iha duni prioridade sei prevee orsamentu iha Orsamenrtu Jerál Estadu (2026) tinan 2026 atu hadi’a.
Iha parte seluk, durante enkontru entre Prezidente Repúblika ho Primeiru-Ministru, lider na’in rua ne’e ko’alia mós kona-ba iha fulan-Agostu 2025 ne’e Governu sei hahú ona Komite Revizaun Orsamentál.
“Ha’u informa mós ba Prezidente kona-ba fulan oin, ha’u sei la la’o tanba iha de’it finansa hodi haree ba orsamentu tinan oin nian. Atu kurije malu, hadi’a malu, ejije ba malu atu ho responsabilidade ba orsamentu Estadu nian,” nia dehan.
Jornalista : Hortencio Sanchez
Editór : Cancio Ximenes
