Ai-tohar iha Bahú hakanek ema na’in-haat

DILI, 09 Jullu 2025 (TATOLI)–Ai-tohar kauza husi anin-boot hakanek ema na’in-haat iha área pisina, Suku Bahú, Postu Administrativu Baukau Vila, Munisípiu Baukau.

Komandante Operasionál Autoridade Protesaun Sivíl Munisípiu Baukau, Francisco Viana Freitas esplika dezastre naturál referidu akontese iha Segunda, 08 Jullu, purvolta tuku 13:26 Otl.

“Ekipa Bombeiru hamutuk ho saúde evakua kedas vítima sira-ne’e ba halo tratamentu iha ospitál,” Komandante Operasionál Autoridade Protesaun Sivíl (APC-sigla portugeza) Munisípiu Baukau informa ba TATOLI iha edifísiu nasionál Kaikoli, Dili, kuarta ne’e.

Viana haktuir katak ai-sanak ne’ebé tohar konsege kona vítima na’in-haat kompostu labarik na’in-ida no tolu seluk idade joven no kazadu nune’e obrigadu evakua bá Ospitál Rejionál Eduardo Ximenes (HoREX-sigla portugeza) hodi halo tratamentu.

Aleinde ne’e, kauza husi dezastre naturál referidu rezulta mós kioske ida hetan estragadu kamaan no APC seidauk apoia emerjénsia tanba uma referida na’in halo atividade iha Dili.

“Ami diretamente neutraliza kedas dalan nune’e to’o lorokraik movimentasaun transporte hahú normál hikas,” Viana informa.

Viana hateten APC hetan apoia pesoál no ekipamentu husi instituisaun seluk hodi neutraliza dalan (tesi ai) hanesan membru korpu Bombeiru, Floresta Baukau, Konsellu Munisipál Kombatente Libertasaun Nasionál (CMCLN-sigla portugeza), Seksaun Tránzitu Polísia Nasionál Timor-Leste (PNTL) Baukau.

APC kontinua apela ba komunidade iha área munisípiu Baukau atu evita no prevene aan iha fatin risku hanesan foho-lolon, mota ninin inklui tasi-ibun tanba oras ne’e akontese anin-boot.

Jornalista: Natalino Belo 

Editór: Xisto Freitas da Piedade