Estrada difikulta povu Lakluta lori produtu lokál bá merkadu
VIKEKE, 09 Jullu 2025 (TATOLI)—Administradór Postu Administrativu Lakluta, Munisípiu Vikeke, Pascol Gama Martins informa kondisaun estrada ne’ebé aat difikulta povu Lakluta lori sira-nia produtu lokál asesu bá merkadu.
“Kona-ba ami-nia estrada ne’e aat hahú husi pontu entrada to’o Postu Lakluta no liga bá suku rua hanesan Suku Ahik no Laline. Ho kondisaun estrada ne’e komunidade Lakluta ne’ebé hela liu iha foho ne’e sira labele lori podutu lokál bá merkadu,” Pascol Gama Martins ba TATOLI iha Postu Vikeke Vila, kuarta ne’e.
Nia haktuir, Ministériu Obra Públika (MOP) fó-sai katak halo reabilitasaun estrada bá postu Lakluta purvolta kilómetru 22 hahú husi pontu entrada to’o postu, maibé to’o agora seidauk implementa obra.
Tanba kondisaun estrada ne’e, nia dehan, difikulta mós Programa Nasionál Dezenvolvimentu Suku (PNDS) ne’ebé implementa iha suku sira liuliu Suku Ahik no Laline. Obra PNDS ba tinan 2025 ba Postu Lakluta, kompostu Suku Ahik eziste reabilita estrada ho valór orsamentu $25.945,13, reabilita estrada Dilór gasta $28.746,03, konstrusaun bee-moos uza sistema gravitasaun iha Laline gasta $25.945,13, Uma Tolu reabilita sistema bee bomba gasta $23.291,65.
Jornalista: Vitorino Lopez da Costa
Editór: Xisto Freitas da Piedade
