DILI, 09 Jullu 2025 (TATOLI)—Ministra Saúde, Elia dos Reis Amaral, informa Governu Konstitusionál da-sia (IX) nafatin tau atensaun ba profisionál saúde sira hodi hasa’e sira-nia abilidade liu husi progresaun ba sira-nia karreira.
“Agora daudaun, ita-boot sira hatene katak, tinan naruk ona hanesan tinan 10 liu ba, iha profisionál saúde sira, ita presiza tau atensaun no oinsá atu hasa’e sira-nia abilidade ba sira-nia progresaun karreira rasik. Entaun, dahuluk ita ho progresaun karreira depois aumezmu tempu ita halo ba rekrutamentu,” Elia dos Reis Amaral informa ba jornalista sira, hafoin reuniuan Konellu Ministru, iha Palásiu Governu, ohin.
Nia dehan, rekrutamentu ida-ne’ebé mak ba profisionál saúde sira-ne’e sei koloka ba iha kada fasilidade saúde sira, ne’ebé iha balun seidauk kompletu.
“Ne’e loos tanba mapamentu ita sei halo no balun mós mapeamentu halo tiha ona, oinsá bele koloka profisionál saúde sira. Rekrutamentu ba profisonál saúde voluntariu ne’ebé mak atu responde ba ita-nia programa sira-ne’e,” nia dehan.
Jornalista : Felicidade Ximenes
Editór : Cancio Ximenes
