DILI, 09 Jullu 2025 (TATOLI)—
DILI, 09 Jullu 2025 (TATOLI)—Karketu Dili FC kontinua lidera tabele klasifikasaun Liga Futeból Timor-Leste (LFTL) ba jornada dalimak, entretantu Assalam FC okupa segundu lugár.
Ekipa ne’eebé koñesidu ho naran Matak-Malirin ne’e justifikadu lidera iha tabele dahuluk liuhosi jogu ne’ebé hatudu ho konsisténsia tanba durante jornada dalimak Karketu konsege kolleta pontu 15 husi jogu 5.
Husi totál jogu ne’ebé sei hala’o, Karketu sei hela jogu haat iha-ne’ebé posibilidade sei sai kampiaun LFTL ba époka tinan-ne’e bainhira iha jogu jornada daneen no dahitu kolleta tan pontu husi klube rua hanesan Assalam no Emanuel.
Ekipa rua hanesan Assalam FC no Emanuel FC mak sei halo tentativu duni Matak-Malirin ne’e bainhira klube futeból rua referidu kolleta pontu tolu iha jogu jornada daneen, tanba haree ba tabele klasifikasaun, Assalam okupa tabele daruak ho pontu ualu husi jogu lima, enkuantu Emanuel kolleta pontu hitu hodi okupua iha tabele datoluk.
Mezmu nune’e, ekipa Matak-Malirin bele sai kampiaun ona iha jornada daneen bainhira haree konsisténsia ne’ebé Karketu Dili hatudu no kontinua mantein vensedór iha jogu tuirmai hodi kolleta tan pontu tolu no iha jogu seluk (karik) ekipa Assalam FC no Emanuel FC derrota iha jogu jornada daneen.
Entretantu, jogu jornada dalimak rezultadu iha tabele klasifikasaun hatudu katak ekipa DIT FC no FC Coração okupa iha zona mean (degradasi-termu Indonézia) iha-ne’ebé klube rua referidu kolelta pontu haat husi jogu lima iha kompetisaun primeira divizaun LFTL.
Jornalista: Natalino Belo
Editór: Xisto Freitas da Piedade
