VIKEKE, 09 Jullu 2025 (TATOLI)—Vise-Ministra Finansa (MF), Felícia Claudinanda Cruz Carvalho hamutuk ho Prezidente Autoridade Munisípiu Vikeke halo abertura ba jogu komunitáriu dada tali entre instituisaun sira hodi festeja selebra loron Funsaun Públiku ba dala-11.
Iha serimónia abertura ne’e, Vise Ministra Finansa (MF), Felícia Claudinanda Cruz Carvalho, hateten komisaun organizadora (Komisaun Funsaun Públika) realiza jogu komunitáriu sira-ne’e atu selebra loron Funsaun Públika (FP) ne’ebé tinan ida-ne’e sei selebra iha Munisípiu Vikeke.
“Ita hotu hatene katak loron ne’e nu’udár loron funsionáriu sira nian. Funisionáriu sai hanesan makína Estadu nian. Nune’e, ba Vikeke-oan sira-ne’ebé funsionáriu públiku nafatin hala’o misaun ho di’ak,” Felícia Claudinanda Cruz Carvalho hateten iha ámbitu abertura jogu dada tali, iha kampu futeból Vikeke Vila, kuarta ne’e.
Governante ne’e dehan bainhira akontese desentralizasaun, Vikeke-oan sira mak sei jere rasik sira-nia orsamentu ne’ebé aloka mai Munisípiu Vikeke hodi halo dezenvolvimentu iha munisípiu ida-ne’e.
“Atividade ba selebrasaun loron FP ne’e realiza durante semana ida. Tanba ne’e, ha’u husu ba funsionáriu sira partisipa iha atividade desportu komunitáriu sira tenke joga ho di’ak hodi fó ksolok ba ita-nia aan,” nia hato’o.
Atividade sira-ne’ebé festeja loron FP mak hanesan dada tali feto no mane, halai karón, kompetisaun han krupuk, tutur sana rai, dansa entre estudante, marsa, sertame. Atividade sira-ne’e sei ramata iha loron 15 Jullu.
Prezidente Autoridade Munisipál Vikeke, Francisco C. S de Gonzaga Soares hato’o agradesimentu ba Ministériu Finansa tanba deside Munisípiu Vikeke sai uma-na’in ba komemora Loron Funsaun Públika referida.
“Ha’u hato’o agradesimentu ba Ministériu Finansa tanba bele oferese oportunidade ida-ne’e ba Munisípiu Vikeke sai uma-na’in ba realizasaun Loron Funsaun Públika. Ida-ne’e parte ida katak Vikeke la’o bá-oin ita tenke prepara aan ba desentralizasaun poder lokál. Nune’e, ha’u husu ba Vikeke-oan sira hatudu imi-nia matenek, kapasidade hodi organiza eventu nasionál ne’ebé presiza ita hotu nia kolarasaun hodi hatudu katak Vikeke prontu la’o bá-oin,” nia hato’o.
Iha abertura jogu komunitáriu ne’e, hetan partisipasaun husi instituisaun públika sira-ne’ebé eziste iha Munisípiu Vikeke hanesan autoridade lokál, funsionáriu públiku, Polísia Nasionál Timor-Leste (PNTL) Munisípiu Vikeke, profesór, estudante no komunidade husi Postu Vikeke Vila.
Jornalista: Vitorino Lopez da Costa
Editór: Xisto Freitas da Piedade
