Top

TJPI Kovalima aplika prizaun preventiva ba arguidu komete krime omesídiu iha Jakarta II

Polísia Nasionàl Timor-Leste liuhusi Sesaun Investigasaun akompaña arguidu MMS hodi ba hala'o julgamentu interrogatóriu dahuluk iha Tribunál Munisípiu Kovalima. Imajen TATOLI/Celestina Teles.

KOVALIMA,09 Jullu 2025 (TATOLI)- Tribunál Judisiál Primeira Instánsia Munisípiu Kovalima, kuarta ne’e, aplika medida koasaun prizaun preventiva ba arguidu ho inisiàl MMS /MG ne’ebé komete krime omesídiu hodi halakon Pregrina da Conceicão nia vida iha Jakarta II, iha Suku Ainaro, Munisípiu Ainaro.

Iha interrogatóriu dahuluk, Juíza Patrícia de. A.F.B.M Xavier, deside aplika prizaun preventiva ba arguidu MMS tanba prosesu interrogatóriu nota iha indísiu forte katak arguidu envolve duni kazu omesídiu agravadu hodi halakon Pregrina da Conceicão nia vida.

“Ita nia prosesu julgamentu ba interrogatóriu dahuluk, hala’o horisehik. Ohin Tribunál Munisípiu Kovalima le’e sai despaixu hodi aplika medida koasaun prizaun preventiva ba arguidu ho inisiál MMS” dehan Defensór Públiku, Nelson Saldanha Borges informa ba jornalista iha Tribunál Munisípiu Kovalima, ohin.

Nia afirma Tribunál aplika ona medida, maibé sei kontinua hela prosesu investigasaun ba kazu ne’e.

“Ha’u seidauk bele fó sai tanba haree en termu jurídiku sei iha faze segredu justisa no sei iha prosesu investigasaun ha’u labele pronúnsia lai buat ruma” katak Defesór ne’e.

Audénsia julgamentu ne’e prezide husi Juíza titular Patricia de.A.F .B.M Xavier, Arguidu hetan asiténsia legál husi Defensór Públiku, Nelson Saldanha Borges.

Notísia relevante:Autopsia ba mate-isin EDC ne’ebé mate iha Jakarta II finaliza ona

Jornalista:Celestina Teles

Editór: Florencio Miranda Ximenes

Publisidade

Leave a Reply

Latest Post

error: Content is protected !!