TL hato’o inisiativa kria jestaun rekursu naturál iha estadu membru g7+ ba PM Ilha Salomão
HONIARA, 09 Jullu 2025 (TATOLI) — Governu Timor-Leste (TL) hato’o direta inisiativa jestaun rekursu naturál ne’ebé sustentável, partikularmente iha nasaun membru g7+ ba Primeiru-Ministru husi Illa Salomão, Jeremiah Manele.
Asuntu ne’e hato’o bainhira delegasaun Timor-Leste, ne’ebé lidera husi Ministru Petróleu no Rekursu Minerál, Francisco Monteiro hamutuk ho Sekretáriu-Jerál g7+ Helder da Costa no ekipa hasoru direta Primeiru-Ministru husi Illa Salomão, Jeremiah Manele.
Enkontru ne’e hala’o dadeer iha gabinete Primeiru-Ministru Illa Salomão nian, iha ne’ebé delegasaun mos entrega karta ofisiál husi Primeiru-Ministru Kay Rala Xanana Gusmão ne’ebé diriji ba Xefe Estadu no Governu tomak husi nasaun membru g7+ hamutuk 19.
“Hasoru Primeiru Ministru Illa Salomão, entrega mos karta ofisial ida husi ita nia Primeiru Ministru, Kay Rala Xanana Gusmão. Tanba nia mak hakerek hanesan Primeiru Ministru no Sua Eminente no husu ba Xefe Estadu no Xefe Governu g7+ nian para atu tau matan ba ita nia rekursu naturál hodi nune’e ita bele kapitaliza, ita bele ekstrai, eksplora ita nia rekursu naturál ba benefisiu sidadaun g7+ nian,” Helder da Costa informa ba TATOLI hafoin inkontru iha Kuarta ne’e.
Notisia relevante : Timor-Leste dudu kooperasaun área Minerál ho Illa Salomão liuhosi g7+
Iha karta ne’e, Primeiru-Ministru Timor-Leste mós konvida líder g7+ atu fó apoiu ba estabelesimentu Minerál Well Fund, nu’udar mekanizmu konjuntu atu salvaguarda no jere rikeza rekursu naturál nasaun g7+ nian ba benefísiu povu ida-idak nian.
Aleinde Fundu Posu Minarai nian, inisiativa ne’e inklui mós planu longu prazu ida hodi estabelese Banku Investimentu g7+ ne’ebé sei fó apoiu ba projetu dezenvolvimentu nasionál sira iha Estadu-membru sira.
Helder hatutan tan katak iha fulan Setembru, Xefe Estadu no Governu g7+ nian sei hasoru malu fali iha Nova Iorke, iha marjen Asembleia Jerál ONU nian, hodi diskute liután inisiativa ne’e iha fórum altu nível ida ho parseiru dezenvolvimentu internasionál sira.
” g7+ agora dadauk halo aproximasaun ida ne’e hodi bele endosa inisiativa ida ne’e hodi bele fo benefisiu ba longo prazu ba ita nia sidadaun sira iha nasaun g7+”, Helder da Costa konklui.
Iha sorumutu ne’e, Primeiru-Ministru Illa Salomão fó benvindu ba Timor-Leste nia intensaun di’ak no sujere iha kooperasaun liután entre nasaun rua iha área oioin.
Jornalista : Cidalia Fátima
Editora : Armandina Moniz
