DILI, 09 Jullu 2025 (TATOLI)—Universidade Nasionál Timor Lorosa’e (UNTL) planeia realiza seremónia graduasaun ba estudante finalista sira hamutuk 1.700 iha 30-31 Jullu tinan ne’e.
“Tentativa graduasaun dala-XXXII ne’e sei hala’o Jullu nia rohan no ami preparadu,” Reitór UNTL, João Soares Martins hateten iha salaun Katedrál Dili, kuarta ne’e.
Iha biban hanesan, Vise Reitór Asuntu Akadémiku no Garantia Kualidade UNTL, Samuel Freitas hateten serimónia graduasaun ne’e sei hala’o iha Sentru Konvensaun Dili (CCD-sigla portugeza) no tuir númeru finalista ne’ebé iha barak liu, presiza fatin luan no boot atubele akomoda ema 1.700.
Husi totál finalista 1.700 ne’e kompostu husi Fakuldade Agrikultura iha 138, Fakuldade Enjeñaria Siénsia Teknolojia 221, Fakuldade Edukasaun Arte Umanidade 552 no Fakuldade Medisina Siénsia Saúde iha 320.
Entretantu, Fakuldade Ekonómia no Jestaun iha 157, Fakuldade Direitu 32, Fakuldade Siénsia Sosiál 180, Fakuldade Filozofia Siénsia Umana 30, Fakuldade Siénsia Ezata ualu (8) no Fakuldade Turizmu Arte Indústria Kriativa Kulturál 46 inklui Mestradu no Pós Graduasaun hamutuk 16.
Jornalista : Osória Marques
Editora : Julia Chatarina
