Jenerál Falur lansa Monumentu Istóriku Manuboe
VIKEKE, 10 Jullu 2025 (TATOLI)—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Falur Rate Laek hamutuk ho Autoridade Munisípiu Vikeke lansa fatuk dahuluk ba obra Monumentu Istóriku Antiga Postu Tentara Nasional Indonesia (TNI) lokalizadu iha Manuboe, Suku Loihunu, Postu Administrativu Ossú, Munisípiu Vikeke.
Iha lansamentu ne’e, Tenente Jenerál Falur Rate Laek haktuir fatin istóriku barak mak seidauk dezenvolvidu sai sítiu turizmu tanba menus kbiit no rekursu no vontade lakon hanesan uluk halo funu.
“Rai ida-ne’e (Uaibua) uluk ema fakar raan barak, nune’e konstrui monumentu ba ida-ne’e. Tan ne’e, ita simboliza memorial ne’e ba jerasaun foun sira bele hatene. Aleinde ita konstrui monumentu ida-ne’e atu atrai ema estranjeiru sira bele mai vizita ita-nia rai hodi hatene istória pasada funu nian,” Jenerál Falur Rate Laek hateten iha serimónia lansamentu fatuk inan dahuluk, iha Manuboe, kinta ne’e.
Falur dehan, atu konta istória tenke konta mós parte Indonézia nian hotu no konta hotu di’ak no aat sira atu jerasaun foun sira labele repete.
“Funu la’ós ita de’it mak sai vítima, maibé forsa (FALINTIL) mós vítima tanba sira-nia feto-faluk no oan-ki’ak mós barak. Tanba ne’e, liuhusi monumentu ida-ne’e hodi dignifika ita-nia feto-faluk no oan-ki’ak sira iha Indonézia ne’ebá,” nia hato’o.
Kona-ba konstrusaun monumentu ne’e insiativa husi Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Falur Rate Laek no hetan apoia husi Telkomsel iha Timor-Leste.
Iha fatin hanesan, Jestór Telkomsel iha Timor-Leste, Heru Yulianto hateten konstrusaun monumentu ida-ne’e Telkomsel fiar katak sai fatin turizmu ba ekonomia iha Manuboe.
“Telkomsel la’ós haree de’it ba infraestrutura telekomunikasaun, maibé ami sei ajuda poténsia turizmu, kultura iha Manuboe. Bainhira ha’u tesik mai haree bee Loihunu furak tebes ne’ebé tempu ona ita hasa’e poténsia turizmu hodi hasa’e kreximentu ekonómia,” nia hato’o.
Iha biban ne’e, Diretora Luminar Unipessoal, Lda, Joaninha de Araújo Amaral haktuir kontrusaun obra monumentu ida-ne’e Jenerál Falur Rate Laek fó konfiansa ba empreza Luminar hodi konstrui.
“Obra ida-ne’e ha’u hetan konfiansa direta husi Jenerál Falur. Ne’ebé, ha’u prontu apoiu nu’udár Vikeke-oan tanba fatin ne’e fatin istóriku. Ha’u sente Jenerál hanoin di’ak hodi konstrui monumentu ne’e ba jerasaun foun bele hatene istória tempu pasadu nian,” nia hato’o.
Konstrusaun monumentu ne’e kompleta ho fatin seguransa (postu) rua, plaka ida, símbolu kilat no seluk tan ne’ebé sei gasta orsamentu hamutuk rihun $25.
Iha serimónia lansamentu ne’e, partisipa husi Prezidente Autoridade Munisípiu Vikeke, autoridade lokál, veteranu, membru F-FDTL no komunidade Ossú.
Jornalista: Vitorino Lopez da Costa
Editór: Xisto Freitas da Piedade
