MS fó ona lisensiamentu ba unidade saúde hamutuk 312
DILI, 10 Jullu 2025 (TATOLI)–Diretór Nasionál Gabinete Lisensiamentu Rejistu Atividade Saúde husi Ministériu Saúde (MS), Nuno da Costa de Jesus, informa daudaun ne’e sira fó ona lisensamentu ba unidade saúde hamutuk 312, ba klínika no farmásia sira-ne’e fahe ba parte rua mak iha unidade faan ai-moruk rahun no ida seluk fali mak importadora.
“Ida retallu ne’e 142 no ida importadora ne’e 50. Ida retallu ne’e, iha diferensa uitoan tanba nia só faan ai-moruk rahun de’it maibé ida roxer ho retallu ne’e sosa fali husi importadór sira,” nia dehan ba jornalista sira iha Kaikoli, ohin.
Nia informa, ba farmásia retallu hahú selu tasa ho montante $500 no importadora farmásia ne’e montante $1.000, entaun dadaun ne’e iha mós unidade klínika privadu iha ona 120 ne’ebé hetan ona lisensa husi Ministériu Saúde.
“Iha klínika unidade privadu saúde mai kumpre lei ne’e hamutuk 120 mak ita fó ona lisensiamentu ba sira hodi halo sira-nia servisu hanesan servisu internamentu, konsultóriu médiku, dentária, konsultóriu infantíl, laboratóriu sira-ne’e mak hamutuk hetan ona lisensa iha gabinete lisensiamentu ministériu saúde,” nia dehan.
Nia hateten, maske klínika barak mak harii husi ema estranjeiru maibé iha nia diresaun laran maioria timoroan mak hala’o servisu iha klínika referidu, ne’ebé Governu labele halo separasaun.
“Iha biban ne’ mós sira simu tan ona dokumenntu lima iha Gabinete Lisensiamentu, sira mós atu loke tan unidade saúde foun maibé balun domumentu seidauk kompletu,” nia dehan.
Jornalista : Alexandra da Costa
Editór : Cancio Ximenes
