DILI, 10 Jullu 2025 (TATOLI)—Komandu Polísia Nasionál Timor-Leste (PNTL) Munisípiu Baukau liuhosi Seksaun Tránzitu kontinua halo auto stop ba transporte públiku iha Baukau.
Komandante PNTL Munisípiu Baukau, Superintendente João Sancho Pires esplika auto stop ne’ebé hala’o ne’e rutina ho objetivu atu regulariza transporte privadu no públiku tantu motór no karreta atu kumpri Lei Kódigu Estrada.
“Uza motór no karreta respeita sinál tránzitu nune’e labele mosu asidente,” Komandante PNTL Munisípiu Baukau hateten iha ninia kna’ar fatin, Vila Nova, Baukau, kinta ne’e.
Superintendente Pires relata durante hala’o auto stop iha inisiu semana-ne’e, tránzitu rodoviáriu konsege aplika multa ba motorista sira hamutuk 37 kompostu motór hamutuk 13, transporte públiku rua inklui dokumentu 20 ne’ebé konsideradu kontra Lei Kódigu Estrada.
Husi numéru ne’ebé mensionadu, PNTL Baukau aplika koima ba motorista sira tuir erru ne’ebé pesoál idak-idak komete husi $30 ba leten bazeia Lei Kódigu Estrada.
“Balun bá selu ona iha banku no balun seidauk. Maibé, se de’it mak viola ita sei uza lei ne’ebé mak eziste,” Superintendente Pires informa.
Entretantu, Komandu Polísia Baukau kontinua apela ba públiku liuliu pesoál sira-ne’ebé utiliza motór iha estrada públiku atu kumprimenta sinál tránzitu inklui redús velosidade nune’e evita mosu kazu asindente tráfegu iha Baukau.
Jornalista: Natalino Belo
Editór: Xisto Freitas da Piedade
