“Ukun-na’in sira presiza lee relatóriu avaliasaun husi Fundasaun Mahein”
DILI, 10 Jullu 2025 (TATOLI)—Diretór Fundasaun Mahein (FM), Nelson Belo, hateten ukun-na’in sira presiza lee relatóriu avaliasaun husi Fundasaun Mahein ne’ebé públika kada semana, tanba dalaruma relatóriu ne’ebé hakerek bazeia ba peskiza kle’an no uza referénsia ne’ebé kredivél.
Diretór Fundasaun Mahein ne’e informa, Fundasaun Mahein ne’e konstrui durante tinan-16 ona no nia progresu ne’e liuhusi kontribuisaun lubuk ida liuhusi halo peskiza no avalia ba asuntu polítika defeza seguransa hanesan impaktu husi eviksaun, kódigu estrada, arte marsiál, oinsá mós bele haree kona-ba marítima ninian, ASEAN, kazu no krime transnasionál, funu, fuzitivu.
“Maibé ita nafatin hasoru obstákulu barak, tanba dalaruma relatóriu ne’ebé sira hakerek bazeia ba peskiza kle’an nian no uza referénsia ne’ebé kredivél nasionál, maibé dalaruma relatóriu sira ne’e ukun-na’in sira ladun lee,” Diretór ne’e hateten ba Agência Tatoli iha nia kna’ar fatin, Bairru Sentrál, ohin.
Nia esplika, analize sira-ne’e barak no kle’an ba kontribuisaun instituisaun Estadu sira-ne’ebé mak ligasaun di’ak kona-ba asuntu defeza no seguransa hanesan Parlamentu Komisaun B, Ministériu Interiór, Ministériu Defeza, Ministériu Finansa no lina ministeriál ne’ebé iha ligasaun ho tratamentu integradu fronteira.
“Tanba peskiza no avaliasaun sira-ne’e, parte Fundasaun Mahein halo ka rekolla husi nivél polítiku to’o nivél nasionál, entaun bainhira líder polítika sira halo implementasaun sees husi rekomendasaun ne’ebé ami fó no problema sempre akontese beibeik hanesan asidente tráfegu, ema mate iha sela (komarka),” nia hateten.
Nia hatutan, obstákulu seluk mak hanesan fundu ba organizasaun ne’e tanba durante ne’e Fundasaun Mahein lahetan apoiu husi Governu liuhusi Gabinete Apoiu Sosiedade Sivíl (GASC) no patrosinadór internasionál sira, maske daudaun ne’e Fundasaun Mahein hetan fundu husi Fundasaun Ázia
Ida-ne’e afeta ba rekursu umanu mós komesa menus liuliu lakon peskizadór sira-ne’ebé iha esperiénsia no dedikadu tebes, sira tenke sai husi Fundasaun Mahein ba fali fatin seluk, maibé FM iha esperansa boot katak sei iha rekooperasaun.
Jornalista : Alexandra da Costa
Editór : Cancio Ximenes
