Autoridade Baguia kontinua hametin kooperasaun ho komunidade Australiana

DILI, 11 Jullu 2025 (TATOLI)—Autoridade Postu Administrativu Baguia, Munisípiu Baukau, kontinua halo kooperasaun no hametin relasaun ho komunidade husi nasaun Austrália.

Administradór Postu Administrativu Baguia, Mario Xavier da Silva esplika povu Baguia hahú halo relasaun amizade ho komunidade Australiana dezde tinan-2003, iha-ne’ebé hamosu kooperasaun iha área edukasaun, formasaun, ajudu fundu inklui fornese infraestrutura bázika.

“Komunidade Australiana hala’o ona serbisu barak iha Postu Administrativu Baguia, nune’e ita kontinua hametin relasaun ho sira hodi hadi’a infraestrutura bázika,” Administradór Postu Administrativu Baguia informa ba TATOLI iha edifisiu Ministériu Negosiu Estranjeiru no Kooperasaun (MNEK), Praia dos Coqueiros, sesta ne’e.

Mario da Silva sente urgullu partisipa iha konferénsia entre Timor-Leste ho Austrália ne’ebé durante loron-rua foku kona-ba kooperasaun inklui relasaun entre nasaun-rua ne’ebé hala’o durante tinan-25.

Kooperasaun entre povu rua referidu hatudu liuhusi apoia fundu ba profesór voluntáriu sira no bolsa estudu ba estudante sira husi eskola bázika to’o ensinu superiór hanesan apoia fundu ba estudante hamutuk $500 kada tinan iha nivel universidade.

Aleinde ne’e, komunidade Australiana apoia mós grupu feto sira hodi hadi’a vida ekonomia liuhosi kriatividade hanesan homan, suku no soru tais, no apoia kanalizasaun bee-moos ba komunidade Baguia, fornese tanke rezervatóriu no seluk tan.

Autoridade Postu husu kontinua aumenta apoia ba juventude liuliu iha área formasaun lian inglés no komputadór ne’ebé konsideradu importante hodi aumenta kapasidade no koñesimentu.

Entretantu, Postu Administrativu Baguia hala’o relasaun amizade ho komunidade Australiana ne’ebé hanaran Friendship of Baguia, baze iha sidade Stonnington, ne’ebé foku iha área dezenvolvimentu rekursu umanu, troka kultura liuhosi relasaun amizade entre komunidade rai rua.

Jornalista: Natalino Belo 

Editór: Xisto Freitas da Piedade