Autoridade Suku Samalari sei konstrui saladeaula Eskola 20 Agostu Osoluga
DILI, 11 Jullu 2025 (TATOLI)—Autoridade Suku Samalari, Postu Administrativu Baukau Vila sei kontrui saladeaula iha Eskola 20 Agostu iha Aldeia Osoluga liuhosi Orsamentu Programa Nasionál Dezenvolvimentu Suku (PNDS).
Xefe Suku Samalari, Rui Magno Sequeira esplika membru Konsellu Suku liuhosi reuniaun delibera desizaun referida tanba eskola ne’e presiza iha kontinuasaun nune’e saladeaula bele sufisiente ba estudante sira.
“Iha ona faze ba koutasaun. Karik lais liu sei lans iha tempu besik,” Xefe Suku Samalari hateten ba TATOLI iha edifísiu Ministériu Negosiu Estranjeiru no Kooperasaun (MNEK), Praia dos Coqueiros, sesta ne’e.
Rui haktuir membru Konsellu Suku liuhosi Reuniaun Konsellu Suku deside Aldeia Osoluga sai sentru aprendizajen nune’e liuhosi PNDS tinan-ne’e konstrui aumenta tan saladeaula tolu ne’ebé prevee orsamentu hamutuk rihun $40-resin.
Entretantu, Suku Samalari hamutuk aldeia haat kompostu husi Sorulai, Festau, Samalari no Osoluga ho totál populasaun hamutuk 3.187 hosi uma-kain 681.
Jornalista: Natalino Belo
Editór: Xisto Freitas da Piedade
