DILI, 12 Jullu 2025 (TATOLI)–Centro Nacional Chega, Institutu Públiku (CNC, I.P) ezekuta ona Orsamentu Estadu Jerál 2025 48% husi totál orsamentu ne’ebé Governu aloka ba CNC, I.P hamutuk millaun $1.5, ba programa prioridade sira hanesan kultura no patrimóniu, funsionamentu dezenvolvimentu institusionál no inkluzaun sosiál.
“Maibe hanesan institutu públiku ne’ebé hetan mandatu husi Estadu, ita tenke kontinua implementa atividade sira-ne’ebé mak tuir lei haruka,” Diretór Ezekutivu CNC, I.P, Hugo Maria Alves, hateten ba jornalista sira iha edifísiu CNC,I.P, Antigu Komarka Balide, ohin.
Diretór ne’e informa, progresu signifikante mak CNC, I.P elabora manuál ba manorin istória nian hahú husi ensinu báziku to’o ensinu superiór, harii muzeu memoriál iha munisípiu sira, konstrui uma memória ba sobrevivente sira, fó bolsa estudu ba timoroam sira para kontinua sira-nia estudu liuliu ba vítima nia oan sira, entaun iha buat barak mak halo ona.
“Maske iha dezafiu maibé nafatin kontinua hanesan ita iha limitasaun orsamentu. Tanba, ita hakarak atu halo buat barak maibé ho orsamentu ne’ebé aloka limitadu, entaun ita labele halo buat hotu-hotu,” nia hateten.
Maske nune’e, nia garante katak CMC, I.P nafatin fiar katak ho apoiu husi Governu no patrosinadór seluk nia kontribuisaun mak CNC, I.P sei kontinua halo nia servisu ho di’ak.
Jornalista : Alexandra da Costa
Editór : Cancio Ximenes
