DILI, 11 Jullu 2025 (TATOLI)–Diretór Servisu Edukasaun munisípiu Ainaru, Patrício da Costa Magno, hateten, Servisu Edukasaun Ainaru halo ona avaliasaun ba preparasaun ezame períodika daruak.
“Bazeia ba kalendáriu Ministériu Edukasaun, katak eskola hotu iha territóriu nasionál sei realiza ezame segundu períodu, ne’ebé sei realiza iha loron 14 to’o 19 fulan ne’e, nune’e Edukasaun munisípiu Ainaru halo ona avaliasaun ba preparasaun ezame segundu períodu,” Diretór Edukasaun munisípiu Ainaru, hato’o ba Ajénsia TATOLI, iha salaun Nobre Ministériu Negósiu Estranjeiru no Kooperasaun (MNEK), Praia dos Coqueiros, Sesta ne’e.
Parte Edukasaun munisípiu halo ona enkontru ho eskola sira molok atu realiza ezame períodu daruak, kona-ba fasilidade no manorin sira.
“Antes atu realiza ezame segundu períodu, ha’u enkontru ho sira no avaliasaun ba sira-nia preparasaun ba períodu ezame daruak ba pontu ezame. Tanba ita fasilita ona konsesaun ba ezame períodu daruak ne’e hodi fasilita sira no haree surat-tahan ho buat seluk ba ezame, ne’ebé laiha tan ona razaun tanba orsamentu ita apoiu ona ba sira. Hotu-hotu realiza ezame tuir kalendáriu edukasaun,” nia akresenta.
Notísia relevante : Governu tenke fó prioridade ba setór edukasaun iha programa PEDN
Iha sorin seluk, iha eskola balun mak falta manorin-na’in ida to’o rua, maibé la’ós eskola hotu tanba depende ba totál alunu.
“Se ita koloka manorin barak liu no estudante oituan mos hanesan de’it, ne’ebé ita haree diferensa entre estudante, nune’e ita koloka tan manorin sira husi bolsa kandidatu hodi bele reforsa tan sira ne’ebé foun,” nia katak.
Diretór ne’e apela ba estudante sira husi ensinu báziku to ensinu sekundáriu, katak estudante nia dever mak estuda, la’ós hein de’it atu ezame mak estuda.
“Estuda tuir aprendizajen loron-loron, espera katak estudante sira sei hetan valór ne’ebé di’ak,” nia tenik.
Totál eskola iha Ainaru hamutuk 93, kompostu husi ensinu báziku iha 21 no ensinu sekundáriu tékniku vokasionál 3, seluk ba ensinu sekundáriu, eskola Katólika no eskola paralelu sira.
Nune’e mos, Edukasaun munisípiu Ainaru rejista ona manorin ne’ebé tama ona idade reforma 50, ho sira ne’ebé moras permanente iha na’in-sia, no la kleur tan husi Ministériu Edukasaun (ME), Komisaun Funsaun Públika (KFP) no Institutu Nasionál Seguransa Sosiál (INSS) sei bolu sira ne’ebé moras permanente no la ativu ona iha eskola bele tama ona reforma.
“Ita-nia lei reforma obrigatóriu iha ona maibé ne’e implementa iha tinan oin, entaun ita hein relevente bele haree asuntu ne’e,” nia tenik.
Ensinu Sekundáriu Tékniku Vokasionál Públiku iha Ainaru hamutuk tolu ho nia totál estudante 455, Ensinu Sekundária Jerál (ESJ) Públiku haat ho totál estudante 1.723, Ensinu Sekundária Katólika lima ho totál estudante 1.434, Ensinu Báziku iha 88 ho totál estudante 8.898, Ensinu Báziku Katólika 5 ho totál estudante 885, Pre-eskolár Públika 45 ho totál estudante 1.797, Pre-eskolár Katólika 5 totál estudante 157.
Manorin ne’ebé hanorin iha nível eskolaridade iha munisípiu Ainaru hamutuk 1.074.
Jornalista : Osória Marques
Editora : Julia Chatarina
