Jenerál Falur husu komunidade labele hadau malu rai
VIKEKE, 10 Jullu 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek husu komunidade Ossú, Munisípiu Vikeke labele hadau malu rai.
“Ha’u lakohi imi hadau malu rai tun-sa’e de’it. Autoridade relevante hanesan Terra no Propriedade iha hodi sukat rai inklui kontrola ai-teka sira-ne’ebé moris iha Manuboe. Ai-teka sira-ne’e Estadu iha atu kontrola hodi benefísia suku,” Falur Rate Laek ba jornalista sira iha Manuboe, kinta ne’e.
Tenente Jenerál ko’alia kestaun ne’e relasiona ho disputa rai iha Suku Loi-Hunu iha tinan 2016 no kazu disputa rai entre komunidade Suku Loi-Hunu no Suku Uaimori no mós kazu hadau malu ai-teka.
Falur afirma katak ai-teka sira-ne’e la’ós ema ida mak sai benefisiáriu maibé ne’e pertense ba Estadu.
Entretantu, Xefe Suku Loi-Hunu, Filomeno Guterres haktuir katak kona-ba disputa rai iha Suku Loi-Hunu iha kazu rua. Ida akontese iha tinan 2016 entre família Aldeia Samaliu mak hakseluk uma fatin, maibé iha momentu ne’ebá entre parte rua rezolve tuir família ona no kazu ida seluk kona-ba impedimentu programa PNDS atu loke dalan ba Suku Loi-Hunu no Suku Uaimori.
“Iha foin lalais projetu Programa Nasionál Dezenvolvimentu Suku (PNDS) tinan 2024 husi Suku Uaimori nian atu loke dalan purvolta kilómetru ida-resin ne’ebé to’o iha ami-nia Aldeia Samaliu no Aldeia Ue-edan (Suku Uaimori nia área). Tan ne’e mak komunidade aldeia rua ne’e la satisfáz hodi halo impedimentu. Kazu ne’e seidauk iha solusaun. Nune’e, foin lalais aprezenta ona ba autoridade munisipiu atu halibur autoridade suku rua ne’e hodi rezolve, maibé agora seidauk iha solusaun,” nia relata.
Jornalista: Vitorino Lopez da Costa
Editór: Xisto Freitas da Piedade
