DILI, 11 Jullu 2025 (TATOLI)—Organizasaun Mundial Saúde iha Timor-Leste hamutuk ho Ministeiru Saúde, halo lansamentu ba roteiru nasionál zero lepra 2025-2030 ho objetivu atu halakon moras infesioza ida-ne’e tanba tuan ona iha mundu.
Reprezentante OMS iha Timor-Leste, Arvind Mathur, hateten roteiru foun ne’e estabelese nu’udár objetivu ida atu alkansa eradikasaun lepra to’o tinan 2030.
“Roteiru ne’e foka ba estratéjia ida-ne’ebé iha aspetu oioin hanesan deteta kazu sira ho proativu, implementa profilaxe pós-espozisaun (PEP) ho doze úniku no terapia preventiva sira ho rifampisina (SDR) (antibiótiku) iha munisípiu sira ho insidénsia aas no fornese ba profisionál saúde sira ho formasaun no abilidade nesesáriu sira hodi prevene kazu sira,” Arvind Mathur dehan iha Hotél Turizmu, ohin.
Nia subliña, xave ba vijilánsia integradu bazeia ba kazu no sistema informasaun saúde Timor-Leste, mak atu posibilita monitorizasaun ba kazu iha tempu reál no garante katak laiha kazu ida mak la deteta.
Xefe Ekipa husi Programa Kontrolu Lepra Globál OMS nian, Vivek Lal, aprezenta nia intervensaun sira iha kolaborasaun ho parseiru sosiedade sivíl sira hodi kontribui maka’as ba dezenvolvimentu matadalan ida-ne’e.
“OMS kontinua iha kompromisu hodi apoia nasaun afetadu sira hotu iha sira-nia progresu ne’ebé metin no ekuitativu ba ami-nia alvu sira 2030 nian ba eliminasaun lepra, prevensaun ba defisiénsia no eradikasaun husi stigma,” Vivek Lal hateten.
Nia hateten katak lepra bele kura maibé deteksaun no tratamentu tarde, hamutuk ho estigma ne’ebé persistente ne’e difikulta progresu. Roteiru sei foka ba aselera deteksaun kazu, hadi’a buka tuir kontaktu no asegura kompletasaun tratamentu.
Nune’e, Diretora Jerál Kuidadu Primáriu, Elisabeth Leto Mau, informa ba Governu iha ona nia kompromisu kombate moras Lepra.
“Kazu foun sira hatudu katak transmisaun akontese nafatin iha komunidade sira. Atu atinje objetivu zero lepra nian sei presiza dedikasaun ba tempu naruk, asaun sustentável, no kolaborasaun multisetoriál,” Elisabeth Leto Mau, afirma.
Diretora ne’e hatutan, programa ne’e inisialmente sei foka ba rejiaun sira ho númeru kazu aas liu, hanesan Baukau, Bobonaru, Dili, Manatutu, no RAEOA.
Jornalista : Felicidade Ximenes
Editór : Cancio Ximenes
