PAM Vikeke apela ba administradór postu implementa karta sirkulár kona-ba animál livre

VIKEKE, 11 Jullu 2025 (TATOLI)—Prezidente Autoridade Munisipál (PAM) Vikeke,  Francisco C. S de Gonzaga Soares apela ba administradór postu sira atu implementa karta sirkulár ba animál livre sira-ne’ebé okupa espasu públiku.

“Ha’u husu ba autoridade postu, xefe suku sira favór ida implementa karta sirkulár ba animál nian ne’ebé ita fó-sai ona. Vikeke vila implementa ona tanba agora daudaun mós vírus raiva  (rabies) ne’ebé perigozu ba ema-nia vida. Tan ne’e, ita lakohi vírus ne’e da’et ba ema,” Francisco ba Tatoli iha Postu Vikeke Vila, sesta ne’e.

Prezidente Autoridade Vikeke ne’e sujere administradór sira kumpri karta sirkulár ne’ebé munisípiu fó-sai ona hodi implementa no husu komunidade sulan balada sira.

“Animál labele husik livre  tanba animál kuandu livre ita-nia sidade la saudavel no ameasa ita ema. Nune’e mós ameasa ema sira-ne’ebé uza estrada ho transporte,” nia hato’o.

Daudaun ne’e, nia dehan, Postu Vikeke Vila kada loron ekipa operasaun kontinua halo movimentu iha kapitál Vikeke hodi kontrola balada sira-ne’ebé husik livre iha vila laran.

Iha fatin hanesan, Administradór Postu Lakluta, Pascol Gama Martins hateten kona-ba karta sirkulár ba animál nian ne’ebé fó-sai iha Munisípiu Vikeke ne’e, distribui ona ba postu Lakluta.

“Karta sirkulár ne’e ha’u simu ona. Ha’u buka atu halo uluk sosializasaun ba komunidade iha suku haat nune’e ita-nia komunidade prepara luhan ba animál sira,” nia subliña.

Nia haktuir katak karta sirkulár ne’e Postu Lakluta iha  loron 22 fulan-Jullu ne’e hahú halo sosializasaun ba suku sira no loron 30 fulan-Jullu ne’e sei implementa ba animál sira-ne’ebé livre iha espasu públiku sira.

Jornalista: Vitorino Lopez da Costa

Editór: Xisto Freitas da Piedade