DILI, 11 Jullu 2025 (TATOLI) – Parlamentu Nasionál Timor-Leste (TL), liuhusi Komisaun B sei hala’o vizita bá Tailándia, iha 18 Jullu, ho objetivu atu reforsa diplomasia parlamentár ho país ne’e.
Deputadu Komisaun B trata Asuntu Negósiu Estranjeiru, Defeza no Seguransa, Natalino dos Santos, hateten iha vizita traballu ne’e sei hasoru líder Parlamentu no deputadu sira, liuliu aborda kona-ba adezaun Timor-Leste ba Asosiasaun Nasaun Sudeste Aziátiku (ASEAN, sigla inglés).
“Hodi bele halo komunikasaun no artikulasaun, konsertasaun ita-nia adezaun ba ASEAN. Ita husu saida mak presiza halo kooperasaun ho Parlamentu rua. Oinsá atu reforsa polítika Estadu rua ne’e iha komunikasaun di’ak no diplomasia bele la’o di’ak”, nia hateten.
Tuir ajenda, Komisaun mós sei halo fiskalizasaun ba Embaixada Timor-Leste iha Tailándia hodi haree besik liután kondisaun no sira-nia serbisu misaun diplomátika esterna.
Aleinde ne’e, sei vizita mós konsuladu Timor-Leste iha Bali-Indonézia hodi haree mós kondisaun serbisu no atendimentu durante ne’e.
Jornalista: Nelson de Sousa
Editora: Maria Auxiliadora
