DILI, 08 Maiu 2026 (2026)--Timor-Leste liuhusi Prezidente Repúblika, José Ramos-Horta, hamutuk ho Governu, sesta ne’e, ofisialmente lansa eventu importante tolu (3) ba tinan 2026.
Eventu boot tolu (3) referida mak hanesan Maratona Internasionál Díli, Simeira Siénsia ba Dezenvolvimentu no “Natal do Povo” ne’e, hala’o iha Palásiu Prezidensiál Nicolau Lobato, Bairru-Pite, sesta (08 Maiu 2026) ne’e.
“Eventu ne’e forma kalendáriu úniku ida-ne’ebé hatudu Timor-Leste ba mundu iha selebrasaun ba pás, umanidade, desportu no kultura. Maratona personifika ita-nia espíritu reziliénsia, unidade no protesaun ba ita-nia biodiversidade ne’ebé furak,” Ramos-Horta hateten iha nia diskursu.
Nia esplika, Simeira Siénsia nian lori hanoin brillante sira mai Timor-Leste hodi fó inspirasaun ba foinsa’e sira, haburas inovasaun no loke dalan ba kresimentu.
Enkuantu, Natal do Povo reprezenta espíritu verdadeiru husi nasaun, tempu ida atu fó, fahe, no halibur hamutuk nu’udar família ida de’it, hodi garante katak ksolok époka nian to’o ba iha komunidade no moris iha ema timoroan sira hotu nia fuan.
Prezidente Repúblika no Governu Konstitusionál da-sia (IX) konvida parseiru internasionál sira, patrosinadór sira no parte interesada sira seluk atu partisipa no fó apoiu ba eventu estratéjiku tolu ba tinan 2026.
Inisiativa sira-ne’e oferese oportunidade úniku ida atu kolabora ho nasaun ida-ne’ebé dezenvolve lalais, kontribui ba prioridade nasionál sira ho impaktu boot, no partisipa iha tinan ida-ne’ebé ho vizibilidade no kooperasaun internasionál.
Ramos-Horta hatutan, inisiativa sira-ne’e refleta vizaun estratéjiku nasaun nian hodi hametin envolvimentu internasionál, promove dezenvolvimentu inkluzivu, no konsolida unidade nasionál.
Lansamentu ne’e marka inísiu husi esforsu nasionál ne’ebé koordenadu hodi koloka Timor-Leste nu’udar plataforma ba kolaborasaun globál, inovasaun, no interkámbiu kulturál.
Maratona Internasionál Dili 2026
Harii iha tinan 2010 ho patrosíniu husi Prezidente José Ramos-Horta. Maratona Internasionál Dili, promove saúde, bem-estar, no turizmu hodi halibur partisipante lokál no internasionál sira iha selebrasaun desportu no reziliénsia.
Maratona 2026 ho tema “Hadomi Ita-nia Ai-laran no Balada Fuik sira”, sei hala’o iha loron 08 Agostu 2026, no hein katak sei atrai partisipante liu 7.000, inklui atleta internasionál sira, korredór amadór sira no membru komunidade iha kategoria kurrida oioin.
Hanesan eventu desportivu prinsipál ida iha nasaun, Maratona ne’e promove turizmu, vizibilidade internasionál, no envolvimentu komunidade nian, no mós promove konsiensia ambiental no prátika sustentável.
Programa ne’e hahú ho Korrida Selesaun Nasionál iha loron 09 Maiu 2026 iha Dili, hodi atrai partisipasaun públiku dezde inisiu. Jantar Gala ida ho patrosinadór no parseiru sira sei hala’o iha loron 07 Agostu 2026, iha Palásiu Nobre Lahane, hodi fó oportunidade ida atu hametin parseria sira no rekoñese kontribuisaun sira.
Komplementa Maratona, DIM EXPO 2026 sei hala’o iha loron 06 to’o 08 Agostu 2026, iha Palásiu Prezidensiál Nicolau Lobato. Festivál kulturál no ambientál loron-tolu ne’e expande eventu ne’e ba selebrasaun nasionál loron barak, kombina desportu ho kultura, partisipasaun juventude, no sustentabilidade.
Expo sei destaka identidade Timor-oan nian, promove inisiativa ekonomia verde, no envolve parseiru rejionál no internasionál sira iha área sira hanesan konservasaun biodiversidade, inovasaun, no interkámbiu kulturál.
Simeira Siénsia ba Dezenvolvimentu 2026
Simeira Siénsia ba Dezenvolvimentu 2026 sei hala’o iha loron 24–25 Agostu 2026, iha Dili Convention Center, reunidu liu 25 laureadu Prémiu Nobel da Pás, hamutuk ho siensista sira, polítiku sira no inovador sira-ne’ebé koñesidu iha mundu.
Simeira ne’e sei sai hanesan plataforma altu nivel aas ba diálogu kona-ba siénsia, teknolojia, no inovasaun iha servisu dezenvolvimentu sustentável, hodi koloka Timor-Leste nu’udar sentru emerjente ida ba interkámbiu koñesimentu globál.
Jantar Gala ba laureadu sira no bainaka espesiál sira sei hala’o iha 23 Agostu 2026, iha Palásiu Nobre Lahane, hodi oferese oportunidade ida ba interasaun altu nivel no envolvimentu diplomátiku.
Expo Siénsia no Teknolojia sei hala’o paralelu ho Simeira, hodi fornese plataforma ida ba akadémiku sira, estudante sira, emprezariál sira, inovadór sira no patrosinadór sira atu aprezenta peskiza, teknolojia, no solusaun sira ne’ebé relevante ba Timor-Leste nia dezenvolvimentu. Expo sei promove kolaborasaun, troka koñesimentu, no parseria entre peritu internasionál sira no parte interesada lokál sira.
Hafoin Simeira ne’e, partisipante sira sei hola parte iha vizita terrenu ne’ebé organizadu iha Timor-Leste iha loron 26 Agostu 2026, inklui programa sira-ne’ebé foka ba biodiversidade no konservasaun tasi nian iha Illa Ataúru, no mós agrikultura iha foho, produsaun kafé, no meiu subsisténsia rurál iha Aileu no Munisípiu Maubisse.
Vizita sira ne’e ho objetivu atu liga diálogu sientífiku ba realidade lokál no prátika dezenvolvimentu sustentável.
Segmentu envolvimentu rejionál sei hala’o iha 27 Agostu 2026, inklui vizita sira ba Indonézia, hodi hametin liután kooperasaun internasionál no parseria rejionál sira.
Natal do Povo 2026
“Natal do Povo” mak selebrasaun ida-ne’ebé halibur komunidade oioin iha nasaun ho espíritu unidade no solidariedade durante tempu Natál.
“Natal do Povo” hahú ho abertura ba Espozisaun Prezépiu hodi hamoris fila-fali tradisaun Natál ne’ebé apresiada iha nasaun. Espozisaun Prezépiu, tradisaun ne’ebe metin ona iha fiar sarani kristaun nian, nu’udar espresaun profunda kona-ba espiritualidade, kreatividade, no espíritu komunitáriu, Timor-Leste nian.
Tuir mai, Prezidénsia fahe prezente Natál ba komunidade iha munisipiu laran tomak, inklui labarik, faluk, ema ho nesesidade espesiál, pasiente iha Ospitál Nasionál Guido Valadares, prizioneiru, orfanatu no komunidade sira ne’ebé kbi’it laek.
“Natal do Povo” sai nu’udar testemuña ba kompromisu Prezidénsia no Governu nian hodi promove unidade nasionál, selebra kultura Timor-Leste nian, no fahe bensaun sira Natál nian diretamente ho sidadaun sira ne’ebé sira serbí.
Eventu estratéjiku tolu ba tinan 2026 reprezenta esforsu unifikadu ida husi Prezidénsia no Governu atu hasa’e perfil internasionál Timor-Leste nian enkuantu fó benefísiu konkretu ba nia populasaun.
Sira konstitui plataforma ida ba envolvimentu ho parseiru internasionál sira, misaun diplomátika sira, organizasaun dezenvolvimentu sira, no setór privadu, kontribui simultaneamente ba prioridade dezenvolvimentu nasionál sira ba tempu naruk.
Jornalista : Hortêncio Sanchez
Editór : Cancio Ximenes
