Sekretáriu Estadu Floresta kuda ai-kameli iha arredór Igreja Balibó

BOBONARU, 11 Jullu 2025 (TATOLI)—Sekretáriu Estadu Floresta, Fernandino Vieira da Costa hamutuk ho autoridade postu administrativu, autoridade seguransa, líder komunitária no komunidade, sesta ne’e, kuda ai-kameli iha arredór Igreja Parókia Santu António Balibó, Munisípiu Bobonaru.

Atividade kuda ai-kameli ne’e simbolikamente kuda hun-neen de’it, maibé sei kontinua kuda iha loron tuirmai.

Iha intervensaun, Sekretáriu Estadu Fernandino Vieira haktuir atividade kuda ai-kameli iha arredór igreja ne’e hahú ona iha Oekusi no sei kontinua ba parókia no dioseze sira seluk ne’ebé espasu luan ho objetivu atu promove identidade Timor nian.

“Espasu sira hanesan iha parókia ne’e ita kuda ai-kameli ho objetivu atu ita promove nafatin ita nia identidade. Ai-kameli ne’e hanesan parte identidade Timor nian, tanba ne’e ita la’ós kuda de’it iha plantasaun Estadu nian,” nia hateten durante halo intervensaun iha serimónia referida.

Sekretáriu Estadu apela ba komunidade Balibó atu labele tesi ai-kameli hodi halo tranzasaun ilegál ba nasaun viziña Indonézia.

“Se ita fa’an ba sorin ne’e ita-faan ita-nia identidade no ita-nia dignidade. Ema dehan sira hakarak ukun-aan maibé sira fa’an fali sira-nia rikusoin mai ita. Loron ida Estadu sei autoriza fa’an ho legál, la’ós ilegál. Agora ita tenke kuda no kuidadu,” ezekutivu ne’e afirma.

Iha fatin hanesan, Reprezentante Konsellu Kombatente Munisipál Bobonaru, Gilberto Baptista observa katak durante ne’e komunidade balun iha área fronteira, Suku Cowa no Leohitu, Leo-lima tesi-estraga ai-kameli.

“Ha’u haree ai-kameli sira ne’e aat hotu. Ha’u husu veteranu no guarda floresta sira atu haree ida-ne’e tanba ida-ne’e aban-bainrua útil ba ita-nia oan sira,” nia tenik.

Enkuantu, iha tinan 2020, Governu halo ona investimentu kuda ai-kameli iha Postu Administrativu Atabae iha rai ektare 150.

Jornalista: Sergio da Cruz

Editór: Xisto Freitas Piedade