Timor-Leste aprezenta ona karta ba Governu Myanmar

DILI, 11 Jullu 2025 (TATOLI)—Governu Timor-Leste entrega ona karta ba Governu Myanmar ho intensaun atu haforsa kooperasaun bilateral entre nasaun rua.

Notísia Relevante: Pozisaun Myanmar la fó impaktu ba TL nia adezaun ba ASEAN

Karta ne’e entrega husi Embaixadór Timor-Leste ba Malázia, Lisualdo Gaspar ba reprezentante Governu Myanmar Sekretáriu Permanente Ministériu Negósiu Estranjeiru Myanmar, Aung Kyaw Moe, iha marjen Enkontru Ministeriál ASEAN ba da-58 iha Sentru Konvensaun Kuala Lumpur-Malázia.

Minitru Negósiu Estranjeiru no Kooperasaun (MNEK), Bendito dos Santos Freitas, konfirma karta ne’e entrega ona ba reprezentante Governu Myanmar nian iha Malázia bazeia ba pedidu ne’ebé husi Governu Myanmar.

“Ohin, ita aprezenta ona karta tuir pedidu ne’ebé sira husu liuhusi ita-nia Embaixadór ne’ebé baze iha Kuala Lumpur-Malázia. Karta ne’ebé ita halo, ita mós ba Ministru Prezidénsia Konsellu Ministrus, Agio Pereira, ami haree iha entendimentu hamutuk mak karta ne’e hasai. Konteudu karta ne’e ami seidauk bele dehan, tanba ne’e to’o ba karik sira fó resposta,” Ministru Bendito Freitas hateten liu usi nota ne’ebé Agência Tatoli asesu, ohin.

Ministru Bendito haktuir, karta ne’e Governu Timor-Leste esplika kona-ba kaer prinsípiu no valor sira hanesan respeita direitu umanu, Estadu Direitu Demokrátiku no seluk tan.

“Timor-Leste esplika mós iha karta ne’e katak, kaer nafatin ba prnsípiu ida-ne’ebé ita sempre mai husi luta ida naruk hodi defende valor justisa, demokrasia no direitu umanu, tanba ne’e ita hato’o nafatin ita-nia pozisaun ba asuntu ne’e,” nia dehan.

Entretantu, konteudu kompletu husi dokumentu ne’e seidauk bele fó-sai ba públiku, tanba konfidensiál botanba foin entrega no hein resposta husi Governu Myanmar.

TATOLI