IGEADI hahú normaliza estrada husi Oe-leu bá Kolimau

BOBONARU, 14 Jullu 2025 (TATOLI)—Institutu Jestaun Ekipamentu Apoia Dezenvolvimentu Infaestrutura, Institutu Públiku (IGEADI, I.P-sigla portugeza) Brigada Maria-Tapó, Segunda ne’e, hahú normaliza estrada husi área Hol-lak, Suku Oe-leu liga bá Postu Administrativu Bobonaru Vila no kontinua to’o Suku Kolimau hodi fasilita movimentasaun transporte públiku no privadu.

Intervensaun IGEADI nian ne’e bazeia ba pedidu husi Administradór Postu Administrativu Bobonaru Vila, Munisípiu Bobonaru, Tomás Henriques, ne’ebé submete bá Ministériu Obra Públika iha fulan-Agostu, tinan kotuk.

“Haree ba situasaun no ita-nia kondisaun estrada husi Buipira to’o Kolimau ne’e grave. Sira normaliza uluk ona husi Buipira. Agora, sira hahú fali husi Ili-bole no hafoin ne’e kontinua kedas husi Oe-leu sei tama to’o Kolimau,” Administradór Postu Administrativu Bobonaru ba jornalista sira iha Salaun Maria-Tapó, Bobonaru.

Administradór Postu konsidera maski intervensaun ne’e ho karater emerjénsia de’it maibé bele responde ona komunidade nia preokupasaun liuliu lori produtu lokál asesu bá merkadu.

Entretantu, abitante Bobonaru, Felisberto Afonso de Jesus reforsa Governu presiza tau prioridade ba estrada ne’e iha Orsamentu Jerál Estadu tinan 2026 tanba kada tinan IGEADI halo normalizasaun maibé tempu udan aat filafali.

“Ami nu’udár povu ki’ik kontente no fó obrigadu ba Governu tanba bele ateru ona halo kabeer, maibé tuir ami-nia hanoin ne’e di’akliu ita halo foun nune’e tinan-tinan labele gasta osan ba ateru, tanba ateru ne’e udan bosok karreta boot sama ne’e aat fali ona,” nia fó-hanoin.

Estrada referida liga mós ba Postu Administrativu Lolotoe (Bobonaru), Postu Administrativu Atsabe (Ermera) no Postu Administrativu Zumalai, Munisípiu Kovalima inklui Munisípiu Ainaru.

Rekorda fali katak iha tinan 2017 Governu liuhusi Ministériu Transporte no Komunikasaun kontrata kompaña lokál Vieramor Unipessoál, Lda halo manutesaun estrada hahú husi Buipira, Suku Lahome, Postu Administrativu Maliana liga bá Postu Administrativu Bobonaru ho kustu millaun $2-resin, maibé projetu ho karater emerjénsía ne’e to’o agora seidauk finalizadu no paradu hela, tanba Governu liuhusi ministériu Kompetente sei halo revizaun ba dezeñu no Bill of Quantities (BOQ).

Jornalista: Sergio da Cruz

Editór: Xisto Freitas da Piedade