DILI, 14 Jullu 2025 (TATOLI)–Selesaun nasionál husi modalidade futeból Portugál nian daudaun ne’e preparadu ona atu viajen mai Timor-Leste hodi compete iha jogu desportivu Komunidade Nasaun Ko’alia Lian Portugés (CPLP-sigla portugés).
Selesaun Nasionál U-16 Portugál hamutuk na’in-18 ne’e sei kompete hodi joga hasoru ekipa selesaun nasionál sira husi Angola, Cabo Verde no Timor-Leste iha Dili, tanba iha abertura jogu desportivu CPLP ne’e ekipa uma-na’in Timor-Leste sei joga hasoru ekipa Selesaun Nasionál U-16 Portugál.
“Treinadór Nasionál Pedro Silva nomeia ona jogadór na’in-18 ba Selesaun Nasionál U-16, ne’ebé sei partisipa iha XII Jogu Desportivu CPLP, ne’ebé sei hala’o iha Dili, Timor Leste,” tenik iha nota ne’ebé Agência TATOLI asesu iha pajina Federasaun Futeból Portugál nian, ohin.
Selesaun Portugál sei hasoru selesaun nasionál Timor-Leste (jogu iha loron 19 fulan-Jullu), Angola (loron 21 fulan-Jullu), no Cabo Verde (loron 24 fulan-Jullu) iha sira-nia grupu, ho enkontru ida tuir mai hodi determina klasifikasaun torneiu nian.
Jogu estreia sei hala’o iha loron 19 fulan-Jullu hasoru ekipa uma-na’in, hafoin serimónia abertura. Jogu sira seluk sei hala’o iha loron 21, 23, no 25 fulan-Jullu.
Treinadór Nasionál Pedro Silva bolu ona jogadór na’in-18 ba torneiu desportivu boot ida-ne’e.
Jogadór sira-nia naran
Lista jogadór Selesaun Nasionál U-16 Portugál nian mak hanesan André Duarte, Denis Mota, Samuel Freire, Rodrigo Valente, Diego Sousa, Luis Silva, Manuel Pires, Martim Catela, Gonçalo, Guilherme Miranda, Alberto Bock, Francisco Costa; João Monteiro, Guilherme Souza, Gonçalo Santos, Leonardo Lisboa, Martim Barbosa no Simão Figueiredo.
Jornalista : Hortencio Sanchez
Editór : Cancio Ximenes
