Komunidade Uma Ki’ik oferese rai ektare 71.67 ba MAPPF
VIKEKE, 14 Jullu 2025 (TATOLI)—Komunidade Suku Uma Ki’ik, Postu Vikeke Vila, Munisípiu Vikeke oferese rai ektare 71.67 ba Governu liuhusi Ministériu Agrikultura, Peska, Pekuária no Floresta (MAPPF) hodi prepara ba futuru haki’ak karau susu-been no na’an karau.
Iha serimónia entrega rai ne’e, Ministru Marcos da Cruz haktuir Munisípiu Vikeke rai ida-ne’ebé poténsia boot ba iha setór ekonómia, la’ós de’it ba agrikultura, pekuária, peska no floresta, maibé riku mós rekursu minerál.
“Ita ko’alia kona-ba agrikultura, Vikeke rai tetuk barak. Tan ne’e, ita liga ba produsaun, ita-nia Primeiru-Ministru rasik tau prioridade ba setór agrikultura, pekuária, peska no floresta,” Marcos da Cruz hateten iha serimónia entrega rai, iha Sede Suku Uma Ki’ik, Segunda ne’e.
Governante ne’e apresia ba komunidade Suku Uma Ki’ik ne’ebé ho laran luak oferese rai ba MAPPF dezenvolve setór pekuáriu hodi fó benefísiu ba povu Vikeke.
“Rai ne’ebé komunidade entrega ami sei entrega tutan ba Sekretaria Estadu Terra Propriedade (SETP) hodi sukat, depois mak ami hanoin implementa karau susu-been nian. Ha’u agradese tebes ba komunidade entrega rai ba ami no ita sei sei servisu hamutuk nafatin. Governu mesak labele halo buat ruma,” nia subliña.
Enkuantu, rai ne’ebé komunidade entrega ba MAPPF lokaliza iha Aldeia Rai Hun, Suku Uma Ki’ik, Postu Vikeke Vila.
Iha biban ne’e, Prezidente Autoridade Munisipál (PAM) Vikeke, Francisco C. S de Gonzaga Soares hato’o agradesimentu ba komunidade Uma Ki’ik ne’ebé oferese rai ba Estadu hodi implementa karau susu-been.
“Ha’u hato’o agradesimentu ba povu Uma Ki’ik ne’ebé ho aten brani oferese rai ba Estadu, hodi halo netik buat ruma ba interese nasionál. Ha’u espera katak bá-oin implementasaun labele mosu impedimentu ruma ligadu ho rai ne’ebé mak oferesidu ba Estadu,” nia hato’o.
Entretantu, reprezentante na’in ba rai, Pedro Amaral deklara katak rai ne’ebé komunidade Uma Ki’ik entrega ba Estadu ne’e ho konxiénsia rasik, la’ós ema ruma mak obriga, hodi uza ba planu ne’ebé ministériu iha atu dezenvolve produsaun pekuária iha Timor-Leste.
Iha serimónia entrega rai ne’e akomapañadu husi Sekretáriu Estadu Pekuária (SEP), PAM Vikeke, SETP, Komadante Polísia Nasionál Timor-Leste (PNTL) Munisípiu Vikeke no autoridade lokál Suku Uma Ki’ik.
Jornalista: Vitorino Lopez da Costa
Editór: Xisto Freitas da Piedade
