VIKEKE, 14 Jullu 2025 (TATOLI)—Sekretáriu Estadu Kooperativa (SEKoop), Arsénio da S. Pereira hamutuk ho Asosiasaun Servi Nodi Moris (ASM), segunda ne’e, lansa plantasaun hudi ho variedade singapura no mandár 3.750, iha Aldeia Umalor, Suku Luka, Postu Administrativu Vikeke Vila, Munisípiu Vikeke.
Iha lansamentu kuda hudi ne’e, akompañadu husi ekipa SEKOOP kompostu husi Diretór Jerál SEKOOP Nasionál, SEKOOP Munisípiu Vikeke, Autoridade Lokál, Polísia Nasionál Timor-Leste (PNTL) Eskuadra Vikeke Vila no membru ASM.
Iha serimónia lansamentu ramata ne’e, Sekretáriu Estadu Arsénio hateten asosiasaun, koopertiva no grupu sira-ne’ebé iha inisiativa hakarak prodús produtu lokál, Governu ninia prezensa fó apoiau tékniku, apoiu morál no apoiu finanseiru ne’ebé liuhusi fundu transferénsia públika.
“Apoiu finanseiru husi SEKOOP liuhusi fundu transferénsia públika bainhira asosiasaun, kooperativa no grupu konkre. Ekipa SEKOOP sei halo avaliasaun no ekipa júri mak haree hodi deside foin entrega ba ha’u hodi halo aprovasaun no selebra kontratu ba benifisiáriu sira. Asosiasaun ida hetan orsamentu subvensaun públika hamutuk rihun $7,” nia dehan ba jornalista sira hafoin ramata lansamentu kuda hudi ektare neen iha Suku Luka.
Governante ne’e argumenta katak hudi mós sai hanesan materiál prima ba indústria ba produsaun jus no hudi sai kadeia valór hahú husi hudi nia hun no ninia tahan sai adubu orgániku.
“Ha’u sente kontene ba asosiasaun ida-ne’e bainhira sira asesu ba fundu transferénsia públika husi SEKOOP no asosiasaun mós konvida ha’u mai halo lansamentu kuda hudi. Aleinde ne’e, ha’u mai hodi fó korajen ba membru asosiasaun sira prodús hudi no tau-matan hudi ne’ebé mak kuda ona,” Arsénio subliña.
Nia dehan, SEKoop sei kontinua apoiu ba komunidade sira tantu grupu, asosiasaun, kooperativa sira, la haree mai husi kór ne’ebé, importante tuir rekizitu sira-ne’ebé estabelese ona iha SEKOOP.
Iha fatin hanesan, Prezidente Asosiasaun Servi Nodi Moris (ASM), Artur Xaveir hato’o agradesimentu ba SEKOOP ne’ebé fó apoiu finanseiru ba ASM hodi implementa kuda hudi ektare neen (6), totál hudi 3.750 ho distánsia kuda 4×4.
“Ami hato’o agradesimentu ba SEKOOP tanba apoia ona finanseiru ba ami hodi kuda hudi no atividade ortikultura. Bá-oin ami sei halo espasaun hudi. Ami garante sustentablidade bazeia ba nesesidade merkadu ne’ebe iha tantu lokál no nasionál,” nia hato’o.
Asosiasaun Servi Nodi Moris iha membru hamutuk na’in-15 kompostu husi mane n’in-sanulu (10) no feto na’in-lima (5) ne’ebé daudaun ne’e ativu iha asosiasaun hodi prodús hudi no atividade ortikultura.
Jornalista: Vitorino Lopez da Costa
Editór: Xisto Freitas da Piedade
