Banku Mundiál: Rekursu umanu importante ba integrasaun ASEAN
DILI, 15 Jullu 2025 (TATOLI) – Timor-Leste iha nesesidade atu prepara rekursu ba adezaun tomak nasaun nian iha Asosiasaun Nasaun Sudeste Aziátiku (ASEAN) iha fulan-Outubru.
Reprezentante Banku Mundiál iha Timor-Leste, David Freedman, hateten importante tebes país kontinua foka ba dezenvolvimentu rekursu umanu iha setór públiku, privadu, no sosiedade sivíl.
“Ami-nia observasaun katak Timor-Leste nia adezaun ba ASEAN sai pasu importante tebes ba nia prosesu dezenvolvimentu”, David Freedman hateten iha Timor Plaza.
Tuir nia, Timor-Leste sai hanesan membru da-11 husi ASEAN no kumpre rekizitu sira ne’ebé define husi organizasaun. “Ida-ne’e hanesan votu konfiansa ida no ami konsidera hanesan sinál pozitivu ida katak bele ajuda nasaun [Timor] atrai investidór sira husi rejiaun ASEAN nian no husi nasaun sira seluk”, hateten.
David Freedman salienta Timor-Leste kumpre hela ezijénsia sira ASEAN nian, liuliu iha área komérsiu no investimentu internasionál, no entre akordu sira seluk iha setór ekonómiku.
“Ida-ne’e hametin enkuadramentu legál. Presiza nota katak Timor-Leste sei sai ofisialmente membru plenu ba ASEAN iha loron 26 fulan-Outubru tinan ida-ne’e”.
Lembra katak Timor-Leste halo esforsu oioin dezde 2011 ho meta ida atu tama hanesan membru plenu ASEAN.
Tanba ne’e, iha tinan 2025, durante simeira ASEAN ba da-46, nasaun membru sira deklara ho unaminidade katak simu ona Timor-Leste hanesan membru plenu no sei ofisializa iha próximu Outubru.
Notísia relevante: Kompete iha merkadu ASEAN, Governu tenke investe maka’as iha setór agríkola
Jornalista: Arminda Fonseca
Editora: Maria Auxiliadora
