BAUKAU, 15 Jullu 2025 (TATOLI)—Federasaun Futeból Timor-Leste (FFTL) hamutuk ho Asosiasaun Futeból Baukau realiza kompetisaun futeból Kopa Juvenil 2025 iha Munisípiu Baukau.
Diretór Interinu Tékniku FFTL, Gaspar Quintão hato’o agradesimentu ba Asosiasaun Futeból Baukau no Autoridade Administrasaun Munisipál (AAM) tanba bele koopera hodi realiza Kompetisaun Kopa Juvenil ba tinan-ne’e kategoria Sub-15 no Sub-17 ne’ebé envolve jogadór mane no feto iha Estádiu Tadeo Laikana.
“Iha tempu sira bá-kotuk, Baukau konsege prodús jogadór barak ho kualidade. Espera ho kompetisaun ida-ne’e bele prodús tan jogadór foinsa’e atu reprezenta Baukau iha nasionál, rejionál no bele reforsa jogu sira iha internasionál,” Gaspar Quintão hateten liuhusi komunikadu imprensa ne’ebé TATOLI asesu, Tersa ne’e.
Quintão husu ba jogadór sira-ne’ebé atu kontinua hatudu disiplina no hatudu talentu durante realizasaun kompetisaun Kopa Juvenil iha Baukau to’o ramata.
Prezidente Asosiasaun Futeból Baukau, Marito da Costa Belo hato’o agradesimentu ba FFTL tanba bele realiza kompetisaun iha Baukau liuhosi Kopa Juvenil 2025 ne’ebé fó oportunidade ba jogadór mane no feto iha Munisípiu Baukau.
“Ida-ne’e motivasaun ba jogadór mane no feto atu hatudu talentu ne’ebé di’ak hodibele sai jogadór ho kualidade no sai oportunidade iha klube ne’ebe partisipa hela liga,” Marito argumenta.
Entretantu, kompetisaun Kopa Juvenil tinan-2025 hahú ona nia abertura iha 11 Jullu liubá ne’ebé partisipa husi Sub-15 hamutuk klube 16 kompostu husi mane ualu no feto ualu, enkuantu Sub-17 hamutuk klube 18 kompostu husi mane 12 no feto neen.
Jornalista: Natalino Belo
Editór: Xisto Freitas da Piedade
