SMAS relata komunidade rihun 15-resin iha Kovalima seidauk asesu bee-moos
KOVALIMA,15 Jullu 2025 (TATOLI)- Servisu Munisipál Agua Saneamentu no Ambiente (SMAS), rekolla ona dadus populasaun ne’ebé mak seidauk asesu bee-moos iha munisípiu Kovalima hamutuk 15,498 .
“ Bazeia ba dadus ne’ebé ita rekolla iha suku no Aldeia ho totál populasaun iha munisípiu Kovalima hamutuk rihun 87, husi númeru ne’e populasaun asesu ona bee-moos rihun 71,916 no seidauk asesu bee-moos hamutuk 15,498”, Diretór Servisu Munisipal Agua Saniamento no Ambiente (SMAS) , Angelino Henrique ,fó sai dadus ne’e iha salaun Kovek Bairu Kosta ohin.
Dirijente ne’e esplika katak razaun komunidade la asesu ba bee-moos la’os sistema bee-moos mak laiha, sistema bee-moos iha ona, maibé distánsia husi tanke públiku no torneira públiku mak dook husi komunidade nia hela fatin.
Ho nune’e SMAS nia responsabilidade atu dada bee-moos ba komunidade sira iha área rurál sira tanba SMAS kontinua halo koordenasaun ho Programa Nasionál Dezenvolvimentu Suku (PNDS) ni parseiru sira seluk ne’ebé implementa projetu bee-moos ba komunidade sira.
“Liga komunidade la asesu bee-moos ita halo ona koordenasaun ho PNDS ho parseiru sira nune’e labele dupla implementa projetu bee-moos iha suku no aldeia hodi halo koordenasuan bainhira se mak implementa ona ita retira”,nia dehan.
Tuir dadus ne’ebé iha ba komunidade ne’ebé seidauk asesu bee-moos ba futuru SMAS nafatin tau iha planu, servisu hamutuk ho PNDS ho parseiru sira atu identifika planu sira ho konjunta nune’e implementa projetu bee-moos labele dupla, nune’e presiza atu fahe tarefa ba malu.
Durante rekolla dadus iha suku no aldeia SMAS hasoru difikuldade tanba laiha transporte, maibé hato’o agradese ba ajénsia PARTISIPA nia-apoia transporte hodi fasilita SMAS rekolla dadus hodi kobre iha suku 30, aldeia 148 postu administrativu hitu mak hanesan postu administrativu Fatululik, Fatumea, Fohorem, Tilomar, Maucatar, Suai no Zumalai iha munisípiu Kovalima.
Jornalista:Celestina Teles
Editór: Florencio Miranda Ximenes
