DILI, 16 Jullu 2025 (TATOLI)–Autoridade lokál lamenta kompañia responsavel abandona projetu konstrusaun Sentru Saúde iha Suku Laisorulai de Baixo, Postu Administrativu Matebian, Munisípiu Baukau.
Portavóz Autoridade Postu Matebian, Júlio Pinto liuhosi konferénsia imprensa esplika projetu referidu hahú konstrusaun iha tinan 2023 no tuir kontratu sei termina iha Janeiru 2024, maibé realidade paradu iha dalan klaran tanba kompañia responsavel abandona serbisu sein iha justifikasaun.
“Husu Ministériu Saúde toma-atensaun ba projetu referidu, tanba gasta volume orsamentu ne’ebé boot,” Portavóz Postu Matebian hateten liuhosi komunikadu imprensa ne’ebé TATOLI asesu, Tersa ne’e.
Nia salienta komunidade iha Suku Laisorulai de Baixo koopera no deside entrega rai privadu hodi konstrui Sentru Saúde maibé realidade hatudu kompañia responsavel abandona serbisu.
“Husu ministériu buka tuir kompañia ne’ebé jere projetu ne’e tanbasá mak seidauk finalizadu,” Júlio kestiona.
Aleinde ne’e, Xefe Suku Abo, Fidélio Sarmento dos Santos husu Ministériu Saúde atu buka solusaun ba preokupasaun ne’ebé hato’o tanba komunidade presiza finaliza projetu ne’e nune’e futuru utiliza ba atendimentu saúde iha Postu Matebian.
“Tuir informasaun husi kompañia katak projetu ne’e foin atinje pursentu 75. Tanba ne’e, ami ezije ministériu relevante atu buka solusaun ba lakuna sira-ne’e,” Fidélio hateten.
Entretantu, Kompañia Dira Nova Unipessoal, Lda mak responsabiliza ba projeitu konstrusaun Sentru Saúde iha Postu Administrativu Matebian, hahú lansa fatuk dahuluk iha loron-19 Juñu 2023 no sei finaliza iha loron-18 Janeiru 2024 ho orsamentu hamutuk $368.917,68, ho númeru kontratu RDTL-MS-DNA-PT-23-052.
Jornalista: Natalino Belo
Editór: Xisto Freitas da Piedade
