Edukasaun Kovalima submete ona pedidu levantamentu orsamentu ba programa merenda eskolár
KOVALIMA,16 Jullu 2025 (TATOLI)-Servisu munisipál Edukasaun (SME) Kovalima submete ona pedidu hodi halo levantamentu orsamentu ba finansa munisípiu atu implementa programa merenda eskolár (PME).
Razaun Edukasaun kovalima submete ona pedidu halo lavantamentu orsamentu, tanba bazeia ba kalendáriu implementasaun programa Merenda eskolár (PME) iha fulan jullu ne’e implementa durante loron efetivu durante loron ualu de’it.
“Iha fulan-Jullu, ita implementa programa merenda eskolár ne’e ami fahe ba loron ualu de’it tanba tuir kalendáriu implementa merenda eskolár no labarik alunu sira hala’o ezame periódu ba daruak”, Diretora Servisu Munisipál Edukasaun, Kovalima Elda de Fátima, relata ba TATOLI,iha Santa Rosa ohin.
Ho nune’e dirijente servisu Edukasaun Kovalima ne’e dehan nia parte submete ona pedidu halo levantamentu orsamentu atu ekipa jestaun programa (EJP) hamutuk 23 hodi implementa iha fulan-Agostu.
Tuir kalendáriu implementa programa PME ba 2025 ho nia loron efetivu durante 148, nune’e iha Jullu ne’e implementa durante loron efetivu ualu no Agostu durante loron 19.
“ Ita submete ona pedidu ba finansa, nune’e osan prosesu ona hein de’it ba fulan-Agostu ne’e atu jere fali hodi implementa PME durante loron efetivu 19 ne’e ho razaun bazeia ba kalendáriu implementasaun PME”nia informa.
Orsamentu PME tinan 2025 aloka ba munisípiu Covalima hamutuk Milliaun $ 1,165,375,68 ne’ebé verba aloka ba eskola pre-eskolár (EPE) hamutuk $ 110.520 no ba eskola ensinu báziku (EB) 23 hamutuk $ 1,278.029
Implementasaun PME 2025 tuir kalendáriu durante loron efetivu 148. Husi ne’e Marsu implementa PME loron 19, Abríl 12, Maiu 20, Juñu 19, Jullu 8, Agostu 19, Setembru 22, Outobru 17 no Novembru 13 implementa husi ekipa jestaun programa (EJP) 23 ne’ebé kria ona no kada alunu iha direitu ba han sentavu 0,35
Alunu ne’ebé benefísia ba PME 2025 ne’e hamutuk 18,828 ne’ebé kompostu hosi eskola pre-eskolár (EPE) alunu hamutuk 1,920, alunu husi eskola báziku (EB) hamutuk 16,828.
Fó hanoin fali katak, implementa programa merenda eskolar (PME) iha 2024 ne’e , hala’o lansamentu iha eskola bázika sentral (EBC) Suai-Loro 13 Maiu. no iha 2025 implementasaun PME lansa iha Eskola Bázika Sentrál (EBC) Lontale iha loron 10 Marsu ne’e.
Jornalista:Celestina Teles
Editór: Florencio Miranda Ximenes
