VIKEKE, 16 Jullu 2025 (TATOLI)—Xefe Departamentu Floresta Reprezentante Territoriál Servisu Agrikultura Munisípiu Vikeke, Júlio Pinto Ribeiro haktuir katak menus transporte difikulta guarda floresta sira halo kontrolu ba ema tesi ai ho ilegalmente iha Munisípiu Vikeke.
“Dezafiu ne’ebé durante ne’e ami hosoru mak transporte no kombustível. Ami iha karreta patrullamentu ida, maibé iha fulan-Janeiru 2025 avaria tiha ona. To’o agora seidauk halo manutensaun. Ida-ne’e difikulta ami-nia guarda floresta sira halo patrullamentu,” Júlio ba jornalista sira iha ninia kna’ar fatin, Kuarta ne’e.
Júlio hatutan guarda floresta sira iha transporte privadu atu ajuda halo movimentasaun, maibé kombustível laiha, nune’e dalaruma sira uza sira-nia saláriu mak ense mina hodi ba halo patrullamentu.
“Tan ne’e mak área balun ami labele kobre no ema tesi ai mós ami labele deteta. Problema sira-ne’e kada fulan ha’u relata beibeik ba nasionál maibé to’o agora seidauk iha resposta,” nia relata.
Nia esplika númeru guarda iha Munisípiu Vikeke oras ne’e daudaun iha de’it na’in-16, presiza aumenta guarda hodi koloka ba kada suku ida ema ida, nune’e bele kontrola ema tesi ai ilegál sira.
“Ita-nia númeru guarda ne’e menus, ne’ebé ema tesi ai parapa iha Postu Uatukarbau, Uatulari no Vikeke Vila ita la toman. Bá-oin ne’e, presiza aumenta guarda hodi koloka ba kada suku 38 iha Munisípiu Vikeke,” nia subliña.
Enkuantu, nia relata, iha trimestre dauruak ne’e, guarda floresta Vikeke apreende ai kabelak no ai-balok hamutuk kúbiku tolu, ne’ebé daudaun ne’e rai hela iha edifísiu Servisu Agrikultura Vikeke no fó-hatene ona ba na’in hodi multa $200 hodi foti filafali sira-nia ai ne’ebé guarda apreende.
Jornalista: Vitorino Lopez da Costa
Editór: Xisto Freitas da Piedade
